ଯୁବତୀଙ୍କୁ ପ୍ରତାରଣା ଅଭିଯୋଗରେ ଯୁବକ ଗିରଫ

ଯୁବତୀଙ୍କୁ ପ୍ରତାରଣା ଅଭିଯୋଗରେ ଯୁବକ ଗିରଫ
ବୁଗୁଡ଼ା : ତା ୨୦/୦୮/୨୩ : ବୁଗୁଡ଼ା ଥାନା ଅନ୍ତର୍ଗତ କୁଞ୍ଜବନ ଗ୍ରାମର ଜନୈକ ଯୁବକକୁ ତା’ର ଯାଜପୁର ସୁକିନ୍ଦା ଅଞ୍ଚଳର ଜନୈକା ଯୁବତୀଙ୍କୁ ପ୍ରତାରଣା କରିବା ଅଭିଯୋଗରେ ଆଜି ପୋଲିସ ଗିରଫ କରି କୋର୍ଟ ଚାଲାଣ କରିଥିବା ଜଣାଯାଇଛି। ଗିରଫ ଯୁବକ ଜଣକ ହେଲେ ଗୌଡିଆବୋରଦା ପଞ୍ଚାୟତ ଅନ୍ତର୍ଗତ କୁଞ୍ଜବନ ଗ୍ରାମର ଉତ୍ତମ ସ୍ବାଇଁ । ଏ ନେଇ ବୁଗୁଡା ଥାନାରେ କେସ୍ ନଂ ୬୦୧/୨୩ ରେ ଏକ ମାମଲା ରୁଜୁ ହୋଇଥିବା ଆଇଆଇସି ଚିତ୍ତରଞ୍ଜନ ବେହେରାଙ୍କ ଠାରୁ ପ୍ରକାଶ ପାଇଛି । ପ୍ରକାଶ ଯେ , ଯାଜପୁର ସୁକିନ୍ଦା ଅଞ୍ଚଳର ଜନୈକା ଯୁବତୀ ଏବଂ ଉତ୍ତମ ଉଭୟେ ଆନ୍ଧ୍ରପ୍ରଦେଶର ଏକ ସୂତା କମ୍ପାନୀରେ କାମ କରୁଥିଲେ । ସେଠାରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା । ପରେ ଉଭୟେ ସେଠାକାର ଏକ ମନ୍ଦିରରେ ବିବାହ କରିଥିଲେ । ବିବାହ ପରେ ସେ ଦୁହେଁ ସୁରଥକୁ ପଳାଇ ଯାଇ ସେଠାରେ କାମ କରୁଥିଲେ । ଛଅ ମାସ ପରେ ସେମାନେ ଉତ୍ତମଙ୍କ ଗାଁକୁ ଆସିବା ପାଇଁ ସୁରଥରୁ ବାହାରି ବ୍ରହ୍ମପୁରରେ ନ ଓହ୍ଲାଇ ଭୁବନେଶ୍ବରରେ ଓହ୍ଲାଇ ଥିଲେ । ବ୍ରହ୍ମପୁରରୁ ଗାଁକୁ ଯିବାକୁ ଥିବାବେଳେ ଭୁବନେଶ୍ବର କାହିଁକି ଆସିଲ ବୋଲି ଯୁବତୀ ଜଣକ ଉତ୍ତମକୁ ପ୍ରଶ୍ନ କରିବାରୁ ପ୍ରଥମେ ଭାଇଙ୍କ ଘରକୁ ଯାଇ ସେଠାରୁ ଗାଁକୁ ଯିବା ବୋଲି ସେ କହିଥିଲା । ସେ ଦୁହେଁ ଭାଇଙ୍କ ଘରକୁ ଯାଇଥିଲେ ସେଠାରେ ତାଲା ପଡିଥିବାରୁ ପୁଣି ବସରେ ବ୍ରହ୍ମପୁରକୁ ଫେରିଥିଲେ । ଶୌଚାଳୟକୁ ଯାଇକରି ଆସୁଛି କହି ଉତ୍ତମ ଯୁବତୀ ଜଣକୁ ସେଠାରେ ଏକାକୀ ଛାଡି ଛୁ ମାରିଥିଲା । ଯୁବତୀ ଜଣକ ଉତ୍ତମକୁ ଦୀର୍ଘ ସମୟ ଧରି ଅପେକ୍ଷା କରି ନିରାଶ ହେବା ପରେ ସେ ବ୍ରହ୍ମପୁରରୁ ଆସି ବୁଗୁଡ଼ା ଥାନାରେ ପହଞ୍ଚି ତାହାର ବିରୁଦ୍ଧରେ ଅଭିଯୋଗ କରିଥିଲେ । ଯୁବତୀଙ୍କ ଅଭିଯୋଗ କ୍ରମେ ଆଜି ପୋଲିସ କୁଞ୍ଜବନ ଗ୍ରାମରୁ ଉତ୍ତମକୁ ଗିରଫ କରି କୋର୍ଟ ଚାଲାଣ କରିଥିଲା ।