ଗଜପତି:- ଅଡବା ପୋଲିସ ପକ୍ଷରୁ ୪୩ ଟି ଜରି ବ୍ୟାଗରେ ଭର୍ତ୍ତି ଥିବା ୧ ହଜାର ୭୫ କେଜି ଚୋରା ଗଞ୍ଜେଇ ଜବତ
ଗଜପତି ଜିଲ୍ଲା ମୋହନା ବ୍ଲକ୍ ଅନ୍ତର୍ଗତ ଅଡବା ଥାନା ପୋଲିସ ପକ୍ଷରୁ ଗୁଲୁବା ଗ୍ରାମ ପଞ୍ଚାୟତର ଗାଲିମେରା ଗ୍ରାମ ନିକଟସ୍ଥ ଜଙ୍ଗଲରୁ ୧ ହଜାର ୭୫ କେଜି ଚୋରା ଗଞ୍ଜେଇ ଧରିବା ଓ ସେ ସବୁକୁ ଜବତ କରିବାରେ ସଫଳ ହୋଇଛି ।
ଗତ କାଲି ସନ୍ଧ୍ୟାରେ ଅଡବା ଥାନାର ଏକ ପୋଲିସ ଦଳ ରାସପେଟ, ଗାଲିମେରା ଏବଂ ନିକଟସ୍ଥ ଅଞ୍ଚଳ ଅଭିମୁଖେ ପାଟ୍ରୋଲିଂ/ଗଞ୍ଜା ଚଢାଉ ଡ୍ୟୁଟି କରୁଥିବା ସମୟରେ, ଗାଲିମେରା ନିକଟସ୍ଥ ଜଙ୍ଗଲରେ ପରିତ୍ୟକ୍ତ ଅବସ୍ଥାରେ ସନ୍ଦିଗ୍ଧ ଗଞ୍ଜା ଥିବା ୪୩ ଟି ପ୍ଲାଷ୍ଟିକ୍ ଜେରି ବ୍ୟାଗ ଚିହ୍ନଟ କରିଥିଲେ। ପରେ ଏହି ସୂଚନା ବରିଷ୍ଠ ଅଧିକାରୀ ମାନଙ୍କୁ ଦିଆଯାଇଥିଲା ଏବଂ ଜଣେ କାର୍ଯ୍ୟନିର୍ବାହୀ ମାଜିଷ୍ଟ୍ରେଟଙ୍କୁ ଘଟଣା ସ୍ଥଳକୁ ପଠାଯାଇଥିଲା। ମାଜିଷ୍ଟ୍ରେଟ ଏବଂ ସାକ୍ଷୀ ମାନଙ୍କ ଉପସ୍ଥିତିରେ, ଭର୍ତ୍ତି ଥିବା ଜରି ବ୍ୟାଗ ଗୁଡ଼ିକ ଖୋଲା ଯାଇଥିଲା ଏବଂ ସେହି ଜରି ବ୍ୟାଗ ଭିତରେ ଥିବା ପଦାର୍ଥକୁ ଗଞ୍ଜା ଭାବରେ ଚିହ୍ନଟ କରାଯାଇଥିଲା ଏବଂ ଏହାକୁ ପୃଥକ ପୃଥକ୍ ଭାବରେ ଓଜନ କରାଯାଇଥିଲା। ଓଜନ କରାଯିବା ପରେ ତାହା ମୋଟ ପରିମାଣ ୧,୦୭୫ କିଲୋଗ୍ରାମ ବୋଲି ଜଣାପଡିଥିଲା। ଏନଡିପିଏସ ଆଇନର ବ୍ୟବସ୍ଥା ଅନୁଯାୟୀ ଚୋରା ସାମଗ୍ରୀ ଜବତ କରାଯିବା ସହ ସଠିକ୍ ଭାବରେ ପ୍ୟାକିଂ ଏବଂ ସିଲ୍ କରା ଯାଇଥିଲା।
ଜଙ୍ଗଲରେ ଏହି ଚୋରା ଗଞ୍ଜେଇ ସବୁ ପରିତ୍ୟକ୍ତ ଅବସ୍ଥାରେ ପଡ଼ି ରହିଥିଲା , ଅନୁମାନ କରା ଯାଏ ଯେ, ଏ ସବୁ ଗଞ୍ଜେଇ ଅଜଣା ଦୁର୍ବୁତ୍ତ ମାନେ ବାହାର ସହରାଞ୍ଚକୁ ଚୋରା ଚାଲାଣ କରିବା ପାଇଁ ରଖିଥିଲେ ।
ଏ ସଂକ୍ରାନ୍ତରେ ଅଡବା ଥାନା ପକ୍ଷରୁ କେଶ ନଂ ୧୯୪/୨୦୨୬, ୨୦ (ଖ)(୨)(ଗ) ଏନଡିପିଏସ ଆଇନ ପ୍ରକାରେଏକ ମାମଲା ପଞ୍ଜିକୃତ ହୋଇଥିଲା ଏବଂ ଚୋରା ସାମଗ୍ରୀ ପରିବହନ/ଅବହନରେ ସମ୍ପୃକ୍ତ ବ୍ୟକ୍ତିମାନଙ୍କୁ ଚିହ୍ନଟ ଏବଂ ଗିରଫ କରିବା ପାଇଁ ପ୍ରୟାସ ଜାରି ରହି ଥିବା ପୋଲିସ ସୂତ୍ରରୁ ଜଣାଯାଇଛି।
——————————————
ଗଣେଶ କୁମାର ରାଜୁ
ପାରଳାଖେମୁଣ୍ଡି (ଗଜପତି)
—————————————–
