କନ୍ଧରା ସ୍ମୂତିପୀଠରେ ସନ୍ଥକବି ଭୀମ ଭୋଇଙ୍କ ଜୟନ୍ତୀ ସନ୍ଥକବି ଭୀମ ଭୋଇ ଥିଲେ ଦିବ୍ୟଦ୍ରଷ୍ଟା ଓ ସମାଜ ସଂସ୍କାରକ
ସମ୍ବଲପୁର, ୦୨. ୦୫(): ସନ୍ଥକବି ଭୀମ ଭୋଇ ଥିଲେ ଦିବ୍ୟଦ୍ରଷ୍ଟା ଓ ସମାଜ ସଂସ୍କାରକ। ସେ ସମଗ୍ର ଜଗତର କଲ୍ୟାଣ ପାଇଁ ନିଜକୁ ନର୍କକୁ ଠେଲି ଦେବାକୁ ପ୍ରସ୍ତୁତ ଥିଲେ ବୋଲି କନ୍ଧରା ଭୀମ ଭୋଇ ସ୍ମୃତିପୀଠରେ ସନ୍ଥକବି ଭୀମ ଭୋଇ ଏକାଡେମୀ ପକ୍ଷରୁ ଆୟୋଜିତ ସନ୍ଥକବିଙ୍କ ଜୟନ୍ତୀରେ ଉପସ୍ଥିତ ଅତିଥିଗଣ ମତବ୍ୟକ୍ତ କରିଥିଲେ। ପ୍ରଧ୍ୟାପକ ଆଖିଳ ବିଶ୍ବାଳଙ୍କ ଅଧ୍ୟକ୍ଷତାରେ ଆୟୋଜିତ ସଭାରେ ଏମସିଏଲ କଣିହାଁ ଏରିଆ ମହାପ୍ରବନ୍ଧକ ଦିନେଶ ମାଲି ମୁଖ୍ୟ ଅତିଥି, ବୀରମହାରାଜପୁର କଲେଜର ବରିଷ୍ଠ ଅଧ୍ୟାପକ ପ୍ରକାଶ ସେଠ୍ ମୁଖ୍ୟବକ୍ତା, ସାମ୍ବାଦିକ ବେଣୁଧର ପ୍ରଧାନ ଓ ଶିକ୍ଷାବିତ୍ ଚକ୍ରଧର ପ୍ରଧାନ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଏହି କାର୍ଯ୍ୟକ୍ରମକୁ ବାବା ବ୍ରହ୍ମ ଅବଧୂତ ଆନନ୍ଦ ଚନ୍ଦ୍ର ଦାସ ଉଦଘାଟନ କରିଥିଲେ। ଏ ଅବସରରେ ଶ୍ରୀ ମାଲିଙ୍କ ରଚିତ ସନ୍ଥକବି ଭୀମ ଭୋଇଙ୍କ ଜୀବନୀ ଆଧାରିତ ଉପନ୍ୟାସ ରଶ୍ମି ଲୋଚନ, ସ୍ତୁତି ଚିନ୍ତାମଣିର ହିନ୍ଦି ଅନୁବାଦ, ଶିଶୁ ପତ୍ରିକା ‘ଆମ କୁନାକୁନି’ର ଚତୁର୍ଥ ସଂଖ୍ୟା ଉନ୍ମୋଚିତ ହୋଇଥିଲା। କବି ଦେବେନ ପଟେଲଙ୍କ ସଂଯୋଜନାରେ ବହୁ କବି ସ୍ୱରଚିତ କବିତା ପାଠ କରିଥିଲେ। ଶିକ୍ଷକ ଅନୀଲ ମେହେର ଅତିଥି ପରିଚୟ ପ୍ରଦାନ ଓ ସଭା ସଂଯୋଜନା କରିଥିଲେ। ସନ୍ଥକବି ଭୀମ ଭୋଇ ଏକାଡେମୀର ଅଧ୍ୟକ୍ଷ ମୁରଲୀଧର ସେଠୀ ପ୍ରାରମ୍ଭିକ ବକ୍ତବ୍ୟ ପ୍ରଦାନ କରିଥିଲେ ଓ ଧନ୍ୟବାଦ ଦେଇଥିଲେ। ବାବା ମହେନ୍ଦ୍ର ତ୍ୟାଗୀ, ଗୋକୁଳାବାବା, କଦଳୀଗଡ଼ ଅର୍ଜୁନ ସ୍ନାତକ କଲେଜର ଅଧ୍ୟକ୍ଷ ଅଖିଳେନ୍ଦ୍ର ଶାସନୀଙ୍କ ସହ ରେଢ଼ାଖୋଲ, ନାକଟିଦେଉଳ, ବୀରମହାରାଜପୁର, କିଶୋରନଗର ଓ ବୌଦ୍ଧ ଅଞ୍ଚଳର ମହିମାଶ୍ରିତ ସାଧୁ, ଭକ୍ତ, ଶିକ୍ଷାବିତ୍, ସାହିତ୍ୟିକ ଓ ସମାଜସେବୀ ଉପସ୍ଥିତ ଥିଲେ। କନ୍ଧରା ଭୀମ ଭୋଇ ଯୁବକ ସଂଘ ତଥା ଗ୍ରାମ୍ୟ କମିଟିର ସଭାପତି ଧ୍ରୁବଚରଣ ଦାଶ, ସୁମନ୍ତ ପ୍ରଧାନ, ଅଲେଖ ମେହେର, ପଞ୍ଚାନନ କର୍ମୀ, କୁନା ମେହେର, ଗୋକୁଳାନନ୍ଦ ମେହେର, ଅଭିମନ୍ୟୁ କର୍ମୀ ଓ ଅନ୍ୟମାନେ ସହଯୋଗ କରିଥିଲେ।ଏହା ପୂର୍ବରୁ ସକାଳେ ରେଢ଼ାଖୋଲସ୍ଥିତ କବିଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରାଯାଇଥିଲା।
