ମଇଁଷି ବୋଝେଇ ଗାଡି ଧକ୍କାରେ ମହିଳା ଶ୍ରମିକ ଗୁରୁତର
ବୁଗୁଡ଼ା : ତା ୧୪/୦୫/୨୩ : ବୁଗୁଡ଼ା ବ୍ଲକ କରସିଙ୍ଗି ପଞ୍ଚାୟତ ଅନ୍ତର୍ଗତ ଉଦୟପୁର ଗ୍ରାମ ଶିବ ମନ୍ଦିର ନିକଟରେ ଏକ ମଇଁଷି ବୋଝେଇ ଗାଡି(ନଂ-ଓଡି-୦୭କ୍ଯୁ ୯୬୪୪)ଧକ୍କାରେ ଜଣେ ମହିଳା ଶ୍ରମିକ ଗୁରୁତର ହୋଇ ବ୍ରହ୍ମପୁରକୁ ସ୍ଥାନାନ୍ତର ହୋଇଥିବା ଜଣାଯାଇଛି । ଗୁରୁତର ମହିଳା ଶ୍ରମିକ ଜଣକ ପୋଲସରା ଥାନା ଅନ୍ତର୍ଗତ ରୁଖାକଣା ଗ୍ରାମର ଲୋଚନା ସାହୁ (୪୦) । ପ୍ରକାଶ ଯେ , ଉଦୟପୁର ମନ୍ଦିର ନିକଟରେ ରାସ୍ତାର ସାଇଡ୍ ଓ୍ବାଲ୍ ନିର୍ମାଣ କାର୍ଯ୍ୟ ଚାଲୁଥିବା ବେଳେ ସେଥିରେ କେତେକ ଶ୍ରମିକ କାମ କରୁଥିଲେ । ତେବେ ଆଜି ଅପରାହ୍ନରେ କରସିଙ୍ଗି ପଟୁ ବୁଗୁଡ଼ା ଆଡକୁ ଦ୍ରୁତ ଗତିରେ ଆସୁଥିବା ଏକ ମଇଁଷି ବୋଝେଇ ଗାଡି କାର୍ଯ୍ୟରତ ମହିଳା ଶ୍ରମିକଙ୍କୁ ଧକ୍କା ଦେବା ଫଳରେ ସେ ଛିଟିକି ହୋଇ ପଡିଥିଲେ । ଦୁର୍ଘଟଣା ଘଟିବା କ୍ଷଣି ଆଖି ପିଛୁଳାକେ ଡ୍ରାଇଭର ଜଣକ ଗାଡିରୁ ଚମ୍ପଟ ମାରିଥିଲା । ଅଚେତ ଅବସ୍ଥାରେ ପଡିଥିବା ଆହତ ମହିଳା ଜଣକୁ ଅନ୍ୟ ଶ୍ରମିକମାନେ ଉଦ୍ଧାର କରି ବୁଗୁଡ଼ା ମେଡିକାଲକୁ ଆଣିଥିଲେ । ଆହତଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା । ତାଙ୍କର ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ ୧୦୮ ଆମ୍ବୁଲାନ୍ସ ଯୋଗେ ବ୍ରହ୍ମପୁରକୁ ସ୍ଥାନାନ୍ତର କରାଯାଇଥିଲା ।
