ଗଜପତି:- ବାତ୍ୟା “ଅର୍ଣ୍ଣବ” ଅବସରରେ ଜିଲ୍ଲାବାସୀ’ଙ୍କୁ ଜିଲ୍ଲାପାଳ’ଙ୍କ ଜରୁରୀ ନିବେଦନ ଓ ସତର୍କତା ବାର୍ତ୍ତା

ଗଜପତି ଜିଲ୍ଲାରେ ବାତ୍ୟା “ଅର୍ଣ୍ଣବ” ଅବସରରେ ଜିଲ୍ଲାବାସୀ’ଙ୍କୁ ଗଜପତି ଜିଲ୍ଲାପାଳ ଶ୍ରୀ ଅକ୍ଷୟ ସୁନିଲ ଅଗ୍ରୱାଲ ପ୍ରେସ ସୂଚନା ମାଧ୍ୟମରେ ଜରୁରୀ ନିବେଦନ ସହ ସତର୍କତା ବାର୍ତ୍ତା ଜଣାଇଛନ୍ତି ।

ଗଜପତି ଜିଲ୍ଲା ପ୍ରଶାସନ ପକ୍ଷରୁ ଜିଲ୍ଲାପାଳ ଶ୍ରୀ ଅକ୍ଷୟ ସୁନିଲ ଅଗ୍ରୱାଲ ଜିଲ୍ଲାବାସୀଙ୍କ ଉଦ୍ଦେଶ୍ୟରେ କହିଛନ୍ତି ଯେ , ପ୍ରିୟ ଗଜପତି ଜିଲ୍ଲାବାସୀ, ବାତ୍ୟା “ଅର୍ଣ୍ଣବ” ର ପ୍ରଭାବରେ ଜିଲ୍ଲାରେ ଲଗାଣ ବର୍ଷା ଜାରୀ ରହିଥିବା ଯୋଗୁଁ ଅନେକ ଅଞ୍ଚଳରେ ବନ୍ୟା ପରିସ୍ଥିତ ସୃଷ୍ଟି ହୋଇଥିବା ବେଳେ ଏଥିରେ ଅନେକ ଗ୍ରାମ ଜଳମଗ୍ନ ହୋଇସାରିଛି ଏବଂ ଅନେକ ପରିବାର ବିପଦର ସମ୍ମୁଖୀନ ହୋଇଛନ୍ତି ।

ବିଶେଷ କରି ଜିଲ୍ଲାର ପ୍ରବାହିତ ହେଉଥିବା ମହେନ୍ଦ୍ର ତନୟା, ବଂଶଧାରା ଓ ହରଭଙ୍ଗି ସମେତ ଅନ୍ୟାନ୍ୟ ନଦୀ ଓ ନାଲ କୂଳରେ ବସବାସ କରୁଥିବା ସମସ୍ତ ଲୋକଙ୍କୁ ଜିଲ୍ଲାର ଜିଲ୍ଲାପାଳ ଭାବେ ମୋର ଅନୁରୋଧ ଯେ, ଦୟାକରି ପରିସ୍ଥିତି ପ୍ରତି ସତର୍କ ରୁହନ୍ତୁ ଆଉ ନିଜ ଜୀବନକୁ ବିପଦରେ ପକାନ୍ତୁ ନାହିଁ ।ଅତ୍ୟନ୍ତ ଆବଶ୍ୟକ ନ ହେଲେ ଘରୁ ବାହାରନ୍ତୁ ନାହିଁ। ନଦୀ, ନାଳ, କିମ୍ବା ବନ୍ୟାଜଳ ନିକଟକୁ ଯାଆନ୍ତୁ ନାହିଁ ଏବଂ ଭୂସ୍ଖଳନ ଆଶଙ୍କା ଥିବା ପାହାଡ଼ିଆ ଅଞ୍ଚଳ ଠାରୁ ସମ୍ପୂର୍ଣ୍ଣ ଭାବେ ଦୂରେଇ ରୁହନ୍ତୁ ।

ଜିଲ୍ଲା ପ୍ରଶାସନ ପକ୍ଷରୁ ବିପଦପୂର୍ଣ୍ଣ ଅଞ୍ଚଳରେ ରହୁଥିବା ଲୋକ ମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ ଯୁଦ୍ଧକାଳୀନ ଭିତ୍ତିରେ ପ୍ରୟାସ ଚାଲିଛି । ପ୍ରଶାସନ ଆପଣ ମାନଙ୍କୁ ଆବଶ୍ୟକ ସ୍ଥଳେ ସ୍ଥାନାନ୍ତର ହେବାକୁ ଅନୁରୋଧ କଲେ, ଦୟାକରି ଏଥିରେ ବିଳମ୍ବ ନ କରି ତାଙ୍କୁ ସହଯୋଗ କରନ୍ତୁ , କାରଣ ଆପଣଙ୍କ ଘର ଓ ଜିନିଷ ଠାରୁ ଆପଣଙ୍କ ଜୀବନ ଅନେକ ମୂଲ୍ୟବାନ ଅଟେ ।

ଆପଣ ମାନଙ୍କୁ ମୋର ଆଉ ଏକ ନିବେଦନ ଯେ, ନିଜ ସହିତ ପଡ଼ୋଶୀ, ବୟସ୍କ ବ୍ୟକ୍ତି, ଶିଶୁ, ଗର୍ଭବତୀ, ମହିଳା ଓ ଅସହାୟ ଲୋକ ମାନଙ୍କ ସୁରକ୍ଷା ପ୍ରତି ମଧ୍ୟ ଏଭଳି ପରିସ୍ଥିତି ସମୟରେ ଆବଶ୍ୟକ ସାହାଯ୍ୟ ସହଯୋଗ କରନ୍ତୁ। ।

ଗଜପତି ଜିଲ୍ଲାର ପ୍ରତ୍ୟେକଟି ଜୀବନ ଆମ ପାଇଁ ଅମୂଲ୍ୟ । ଜଣେ ମଣିଷର ହେଲେ ବି ଜିବନହାନୀ ଯେପରି ନ ହୁଏ, ସେଥିପାଇଁ ଆମେ ଆମର ତଥା ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ଶକ୍ତି ଲଗାଇ ପ୍ରୟାସ କରୁଛୁ । କିନ୍ତୁ ଏଥିରେ ଆପଣ ମାନଙ୍କ ବିନା ସହଯୋଗରେ ଏହି ପ୍ରୟାସ ସଫଳ ହୋଇପାରିବ ନାହିଁ ।

ଏହା ପ୍ରକୃତିର ଏକ କଠିନ ପରୀକ୍ଷା ।

ଆମେ ସମସ୍ତେ ଧୈର୍ଯ୍ୟ, ସତର୍କତା ଓ ପରସ୍ପର ସହ ସହଯୋଗ ମାଧ୍ୟମରେ ହିଁ ଏହି ବିପଦର ମୁକାବିଲା କରିପାରିବା । ଆପଣ ମାନଙ୍କ ଜୀବନ ଆମର ତଥା ଜିଲ୍ଲା ପ୍ରଶାସନର ପ୍ରଥମ ପ୍ରାଥମିକତା । ଆପଣ ମାନେ ସୁରକ୍ଷିତ ରହିଲେ ଆମ ଗଜପତି ସୁରକ୍ଷିତ ରହିବ । ତେଣୁ କରି ସମସ୍ତେ ସତର୍କ ରୁହନ୍ତୁ, ସୁରକ୍ଷିତ ରୁହନ୍ତୁ ଏବଂ ପ୍ରଶାସନକୁ ସହଯୋଗ କରନ୍ତୁ ବୋଲି ଗଜପତି ଜିଲ୍ଲାପାଳ ଶ୍ରୀ ଅକ୍ଷୟ ସୁନିଲ ଅଗ୍ରୱାଲ ଜଣାଇ ନିବେଦନ କରିଛନ୍ତି।

——————————————

ଗଣେଶ କୁମାର ରାଜପାରାଲାଖେମୁଣ୍ଡି (ଗଜପତି)

—————————————–