ଗଜପତି:- ଶିବରାତ୍ରୀ ପୂର୍ବରୁ ଶିବାଳୟ ହେଲା ପରିଷ୍କାର

ଆଗକୁ ଆସୁଥିବା ମହା ଶିବରାତ୍ରୀକୁ ଦୃଷ୍ଟିରେ ରଖି ସହର ତଥା ଗାଁର ସମସ୍ତ ଶିବାଳୟ ଏବେ ଚଳଚଞ୍ଚଳ। ସମସ୍ତ ଶିବାଳୟ ଏବେ ପୁଣି କିଭଳି ପରିଷ୍କାର ହୋଇ ନୂତନ ରୂପରେ ସଜେଇ ହେବ , ସେ କଥାକୁ ଚିନ୍ତା କରି ପାରଳାଖେମୁଣ୍ଡିର ଯୁବ ସମାଜସେବୀ ଲୋକନାଥ ମିଶ୍ର ଅନ୍ୟ ସ୍ବେଚ୍ଛାସେବୀ ଅନୁଷ୍ଠାନ ତଥା ପ୍ରଶାସନିକ ଅଧିକାରୀଙ୍କ ସାହାଯ୍ୟ ଲୋଡିଥିଲେ ।

ଏହି କ୍ରମରେ ଆଜି ପାରଳାଖେମୁଣ୍ଡି ସ୍ଥିତ ସେରି ସାହି ପଛ ବିଲ ମଧ୍ୟରେ ଥିବା ଏଣ୍ଡାଲା ମଲ୍ଲିକାର୍ଜ୍ଜୁନ ମହାଦେବ’ଙ୍କ ମନ୍ଦିର ତଥା ପୁଷ୍କରିଣୀ’କୁ ଯଥାସମ୍ଭବ ପରିଷ୍କାର କରା ଯାଇଥିଲା। ଏହି ସ୍ୱଚ୍ଛତା କାର୍ଯ୍ୟକ୍ରମରେ ସହଯୋଗର ହାତ ବଢାଇଥିଲେ ଜିଲ୍ଲା ଖଣି ଅଧିକାରୀ ଦିପେନ ପରିଡ଼ାଙ୍କ ସମେତ ଜିଲ୍ଲା ନ୍ୟାୟାଳୟରେ ପଦସ୍ଥ ଥିବା କ୍ୟାଡ଼ର ପବ୍ଲିକ ପ୍ରସିକ୍ୟୁଟର ଶ୍ରୀ ରାଜେଶ କୁମାର ମିଶ୍ର , ଓକିଲ ସଂଘର ସମ୍ପାଦକ ତଥା ସ୍ପେଶାଲ ପବ୍ଲିକ ପ୍ରସିକ୍ୟୁଟର ଶ୍ରୀ ଏମ୍: ପୃଥ୍ୱୀରାଜ , ଏ.ପି.ପି.ଶ୍ରୀ ସୌମ୍ୟ ସୌରଭ ପଟ୍ଟନାୟକ , ଗାୟତ୍ରୀ ପରିବାରର ସନ୍ତୋଷ ଗନ୍ତାୟତ , ଅଭିଷେକ ଗନ୍ତାୟତ , ଅଖିଳ ଭାରତୀୟ ଯୁବାଜନ ସେବା ସମିତିର ଶ୍ରୀ କୁମାର ରେଡ୍ଡୀ ଓ ଶ୍ରୀ ଗିନି ରମେଶ ପ୍ରମୁଖ।

ସୂଚନାଯୋଗ୍ୟ ଯେ , ଉକ୍ତ ମନ୍ଦିରଟି ମହାରାଜାଙ୍କ ଅମଳର ହୋଇଥିଲେ ମଧ୍ୟ ବିଲ ମଧ୍ୟରେ ରହିଥିବାରୁ ତା’ର ଉପଯୁକ୍ତ ରକ୍ଷଣା ବେକ୍ଷଣା ହୋଇନପାରି ତାହା ଜରାଜୀର୍ଣ୍ଣ ଅବସ୍ଥାରେ ବର୍ଷ ସାରା ପଡିରହୁଛି , କିନ୍ତୁ ଶିବରାତ୍ରୀ ଅବସରରେ ତାହା ଚଳଚଞ୍ଚଳ ହେଉଛି। ତେଣୁ ସର୍ବ ସାଧାରଣରେ ଦାବି ରହୁଛି ଯେ , ଯଦି ଏହି ମନ୍ଦିରର ପୁନରୁଦ୍ଧାର କରାଯାଇ ନିକଟସ୍ଥ ପୁଷ୍କରିଣୀ ପ୍ରତି ଧ୍ୟାନ ଦିଆଯାଆନ୍ତା ଏବଂ ଉଜ୍ଜ୍ୱଳ ଆଲୋକ ବ୍ୟବସ୍ଥା ସହ ରାସ୍ତାର ବ୍ୟବସ୍ଥା କରାଯାଆନ୍ତା , ତାହା ହେଲେ ହୁଏତ ଏହା ଏକ ପର୍ଯ୍ୟଟନସ୍ଥଳୀର ରୂପ ନିଅନ୍ତା ବୋଲି ସମାଜସେବୀ ଶ୍ରୀ ଲୋକନାଥ ମିଶ୍ର ନିଜର ମତ ପ୍ରକାଶ କରିବା ସହ ଆଜିର ଏହି କାର୍ଯ୍ୟକ୍ରମରେ ସାମିଲ ଥିବା ସମସ୍ତ ସ୍ବେଚ୍ଛାସେବୀ ତଥା ପ୍ରଶାସନିକ ଅଧିକାରୀଙ୍କୁ ସହଯୋଗ ପାଇଁ ସାଧୁବାଦ ଜଣାଇ ଭବିଷ୍ୟତରେ ଅନ୍ୟ ମନ୍ଦିରରେ ଏହି ଭଳି ସେବା କାର୍ଯ୍ୟ ଜାରି ରହିବ ବୋଲି ସୂଚନା ଦେଇଛନ୍ତି।

——————————————–

ଗଣେଶ କୁମାର ରାଜୁ

ପାରଳାଖେମୁଣ୍ଡି (ଗଜପତି)

——————————————–