ପ୍ରସ୍ତାବିତ ଅସ୍ତରଙ୍ଗ ବନ୍ଦରକୁ ବିରୋଧ   ମେଳି ବାନ୍ଧିଲେ୯ ଖଣ୍ଡ ମୌଜାର ଅଧିବାସୀ ..                                         

ଅସ୍ତରଙ୍ଗ: ରାଜ୍ୟ ସରକାର ଙ୍କର ବାଣିଜ୍ୟ ପରିବହନ ବିଭାଗ ଓ ହାଇଦ୍ରାବାଦ ସ୍ଥିତ ନବଯୁଗ୍ ଇଞ୍ଜିନିୟରିଂ ଲି, ର ମିଳିତ ସହ ଭାଗିତାରେ ପ୍ରସ୍ତାବିତ ପୁରୀ ଜିଲ୍ଲା ଅସ୍ତରଙ୍ଗ ଶିଳ୍ପ ଭିତ୍ତିକ ବନ୍ଦର ପ୍ରତିଷ୍ଠା ଯୋଜନାକୁ ବିସ୍ଥାପିତ ହେବାକୁ ଥିବା ଗ୍ରାମବାସୀ ବିରୋଧ କରି ପୀର ଜାହାନିଆଁ ପୀଠରେ ମେଳି ବାନ୍ଧିଛନ୍ତି। ପୀର ଜାହାନିଆଁ ଭିଟାମାଟି ସୁରକ୍ଷା ମଞ୍ଚ ଆନୁକୁଲ୍ୟରେ ଅନୁଷ୍ଠିତ ଏହି ବିରୋଧ ସମାବେଶରେ ପୁରୀ ଜିଲ୍ଲା ପରିଷଦ ଉପାଧ୍ୟକ୍ଷ ସ୍ୱାଧୀନ କୁମାର ନାୟକ,ମଞ୍ଚର ଆବାହକ ଶୋଭାକର ବେହେରା, ପ୍ରମୁଖଙ୍କ ସମେତ ହଜାରରୁ ଉର୍ଦ୍ଧ୍ବ ସ୍ଥାନୀୟ ୯ ଖଣ୍ଡ ଗ୍ରାମର ମୂରବୀ, ଗ୍ରାମବାସୀ ଉପସ୍ଥିତ ରହି ସରକାରଙ୍କ ବନ୍ଦର ପ୍ରତିଷ୍ଠା ଯୋଜନାକୁ ପଣ୍ଡ କରିବା ପାଇଁ ବଜ୍ର ଶପଥ ନେଇଥିଲେ । କମ୍ପାନୀ ସ୍ୱାର୍ଥରେ ନିଜର ଭିଟାମାଟି ବନ୍ଦର ପାଇଁ ଦେଇ ନିଜ ଜୀବନ ଜୀବିକା ହରାଇ ସେମାନେ ଦାଦନ ହେବା ପରିବର୍ତ୍ତେ ମୃତ୍ୟୁ ଶ୍ରେୟସ୍କର ବୋଲି ବୈଠକରେ ମତ ପ୍ରକାଶ ପାଇଥିଲା।ଏଥିସହ ବିସ୍ଥାପିତ ହେବାକୁ ଥିବା ଗ୍ରାମାଞ୍ଚଳରେ ସରକାର ଜନ ଶୁଣାଣି କରିବା ପରିବର୍ତ୍ତେ ଆସନ୍ତା ୧୩ ତାରିଖରେ ଅସ୍ତରଙ୍ଗ ମୁଖ୍ୟ ବଜାରରେ କରିବାକୁ ଯାଉଥିବାରୁ ଏହି ଜନ ଶୁଣାଣିକୁ ସେମାନେ ବର୍ଜନ କରିବେ ବୋଲି ବୈଠକରେ ନିଷ୍ପତି କରାଯାଇଥିଲା । ହଜାର ହଜାର ଏକର ସମ୍ପତି ହରାଇ କମ୍ପାନୀ ନିକଟରେ ସେମାନଙ୍କ ଦାୟଦଙ୍କୁ ଗୋତି ଶ୍ରମିକ ହେବାକୁ ଦିଆଯିବ ନାହିଁ ବୋଲି ଉପସ୍ଥିତ ମୂରବୀମାନେ କହି ବନ୍ଦର ପ୍ରତିଷ୍ଠାକୁ ଘୋର୍ ବିରୋଧ କରିଥିଲେ। ଉଭୟ ଭିଟାମାଟି ଓ ଉପକୂଳ ପରିବେଶ ସୁରକ୍ଷା ପାଇଁ ଆନ୍ଦୋଳନ ପଲ୍ଲୀ ଠାରୁ ଦିଲ୍ଲୀ ପର୍ଯ୍ୟନ୍ତ ବ୍ୟାପକ କରାଯିବ ବୋଲି ବୈଠକରେ ବନ୍ଦର ବିରୋଧୀ ଗ୍ରାମବାସୀ ନିଷ୍ପତି ନେଇଥିଲେ। ଏଥି ସହିତ ଆସନ୍ତା ୧୪ ତାରିଖରେ ହଜାର ହଜାର ଗ୍ରାମବାସୀ,ବୁଦ୍ଧିଜୀବୀ ,ପରିବେଶକର୍ମୀ ଓ ଛାତ୍ରଛାତ୍ରୀଙ୍କୁ ନେଇ ବିକ୍ଷୋଭ ସମାବେଶ ଅନୁଷ୍ଠିତ ହେବ ବୋଲି କର୍ମକର୍ତ୍ତା ମାନେ କହିଥିଲେ । ସେପଟେ, ୨୦୧୩ ମସିହା ଡିସେମ୍ବର ମାସରେ ନୂତନ ଜମି ଅଧିଗ୍ରହଣ ଆଇନ ପ୍ରଣୟନ କରାଯାଇ ୨୦୧୪ଜାନୁୟାରୀ ମାସରେ ଏହା କାର୍ଯ୍ୟକାରୀ ହେଲା। ନୂତନ ଆଇନ ଅନୁସାରେ ଯେଉଁ ଅଂଚଳରେ ସରକାର କୌଣସି ପ୍ରକଳ୍ପ କରିବାକୁ ନିଷ୍ପତି ନେବେ ସେ ଅଂଚଳରେ ବିସ୍ଥାପିତ ହେବାକୁ ଥିବା ଜନସାଧାରଣଙ୍କ ମଧ୍ୟରୁ ୮୦ ପ୍ରତିଶତ ଲୋକଙ୍କ ସହମତି ଜରୁରୀ। ଯଦି ସହମତିର ଅଭାବ ପରିଲକ୍ଷିତ ହୁଏ ତେବେ ପ୍ରକଳ୍ପ ନିର୍ମାଣ ପାଇଁ ଜମି ଅଧିଗ୍ରହଣ କରାଯାଇପାରିବ ନାହିଁ। ଆଇନଗତ ପ୍ରତିବନ୍ଧକ ଯୋଗୁଁ ପ୍ରସ୍ତାବିତ ଅସ୍ତରଙ୍ଗ ବନ୍ଦର ଅନିଶ୍ଚିତତା ମଧ୍ୟକୁ ଚାଲିଯାଇଥିଲା। ଏବେ ଆଇନଗତ ପ୍ରତିବନ୍ଧକ ହଟିବା ଓ ଅସ୍ତରଙ୍ଗ ବନ୍ଦର ନିର୍ମାଣ ପାଇଁ ବାଟ ଫିଟିବା ପରେ ଜମି ଅଧିଗ୍ରହଣ କାର୍ଯ୍ୟ ତ୍ବରାନ୍ବିତ ହେଉଛି। ଇତି ମଧ୍ୟରେ ଗତ ୮ ତାରିଖରେ ରାଜ୍ୟ ସରକାରଙ୍କ ଜଙ୍ଗଲ,ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ପକ୍ଷରୁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ବିଜ୍ଞାପନ ଜାରି କରି ଆସନ୍ତା ୧୩ ତାରିଖରେ ଅସ୍ତରଙ୍ଗ ବ୍ଲକ ପଡ଼ିଆରେ ରାଜ୍ୟ ପ୍ରଦୂଷଣ ସଂସ୍ଥା ତରଫରୁ ପରିବେଶ ପ୍ରଭାବ ଓ ବିସ୍ଥାପିତ ଜନିତ ସମସ୍ୟା ସଂପର୍କରେ ଜନ ଶୁଣାଣି ପାଇଁ ଦିନ ଧାର୍ଯ୍ୟ ହୋଇଛି। ବନ୍ଦର କର୍ତ୍ତୃପକ୍ଷ ନ୍ୟାସନାଲ ଇନଷ୍ଟିଚ୍ୟୁଟ ଅଫ୍ ଓସେନୋଗ୍ରାଫି, ଗୋଆ ଦ୍ଵାରା କୋଷ୍ଟାଲ ରିଜିଓନାଲ ଜୋନ୍ ମ୍ୟାପିଂ କରି ପରିବେଶ ମଞ୍ଜୁରୀ ଅପେକ୍ଷାରେ ଅଛି।ବଙ୍ଗୋପସାଗର ଉପକୂଳରେ ଥିବା ଏହି ଅଂଚଳରେ ବନ୍ଦର ପ୍ରତିଷ୍ଠା ହେଲେ ପରିବେଶ ସନ୍ତୁଳନ ବିଗିଡି ଯିବାର ସମ୍ଭାବନା ରହିଛି। ଦେବୀ ମୁହାଣ ସନ୍ନିକଟ ୫୦୦ ହେକ୍ଟର ଜଙ୍ଗଲ ସତ୍ତା ହରାଇବ।ଏହା ବିଭାଗୀୟ ଆଇନ ସେକ୍ସନ – ୪ ଅନୁସାରେ ପ୍ରସ୍ତାବିତ ସଂରକ୍ଷିତ ଜଙ୍ଗଲ ପାଇଁ ବିଜ୍ଞପ୍ତି ହୋଇଛି। ଦୃତ ଅବକ୍ଷୟ ଅଞ୍ଚଳ ଓ ସଂରକ୍ଷିତ ଜଙ୍ଗଲ ଅଂଚଳରେ ନିର୍ମାଣ କାର୍ଯ୍ୟ ବେଆଇନ ଅଟେ। ପ୍ରଥମେ ୧୯୮୧ ମସିହାରେ ଦେବୀ ମୁହାଣ ଅବବାହିକା ବେଳାଭୂମିରେ ଦେଖା ଦେଇଥିବା ଅଲିଭ୍ ରିଡଲେ କଇଁଛଙ୍କ ପାଇଁ ବିଶ୍ଵର ୫ଟି ପ୍ରସିଦ୍ଧ ସ୍ଥାନ ମଧ୍ୟରୁ ଏହି ସାମୁଦ୍ରିକ ବେଳାଭୂମି ତୃତୀୟ ସ୍ଥାନ ହାସଲ କରିଛି।ବନ୍ଦର ପ୍ରତିଷ୍ଠା ହେଲେ ଉଚ୍ଚ କ୍ଷମତା ସମ୍ପନ୍ନ ଆଲୋକ ଯୋଗୁଁ କଇଁଛ ଗୁଡ଼ିକ ଗଣ ଅଣ୍ଡାଦାନ ପ୍ରକ୍ରିୟା ଠାରୁ ଦୂରେଇ ଯିବେ। ଜାହାଜ ଚଳାଚଳ କଇଁଛ ମୃତ୍ୟୁ ହାର ବଢିବ। ଉପକୂଳ ସାମୁଦ୍ରିକ ଜଳ ପ୍ରଦୂଷିତ ହେବ।ମାଛ ବଂଶ ଲୋପ ପାଇବ।ଏଠାରେ ଜୀବିକା ନିର୍ବାହ କରୁଥିବା ୨୫ହଜାର ମତ୍ସ୍ୟଜୀବୀ ଜୀବିକା ହରାଇବେ।କୃଷି କାର୍ଯ୍ୟ ପ୍ରତ୍ୟେକ୍ଷ ଭାବେ ପ୍ରଭାବିତ ହେବ । ହଜାର ହଜାର ଚାଷୀ ଜୀବିକା ହରାଇ ଦାଦନ ସାଜିବେ।ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ରବିନ୍ଦୁ ଭାବେ ପ୍ରସିଦ୍ଧି ଲାଭ କରିଥିବା ଅସ୍ତରଙ୍ଗ ବେଳାଭୂମି ଶ୍ରୀହୀନ ହେବ। କମ୍ପାନୀର ଲାଭ ପାଇଁ ରାଜ୍ୟ ସରକାରଙ୍କ ପର୍ଯ୍ୟଟନ ଶିଳ୍ପ ଅସ୍ତରଙ୍ଗ ଅଞ୍ଚଳରୁ ଅସ୍ତିତ୍ବ ହାରାଇବ। ଏଠାରେ ବନ୍ଦର ପ୍ରତିଷ୍ଠା କୋଷ୍ଟାଲ୍ ରିଜିଓନାଲ ଜୋନ୍ (ସି. ଆର୍ . ଜେଡ୍ )ଆଇନକୁ ଉଲଂଘନ କରିବ। କେନ୍ଦ୍ର ସରକାରଙ୍କ ଜଙ୍ଗଲ ସଂରକ୍ଷଣ ନିୟମ ୧୯୮୦ର ଧାରା ୪୪ ଉପଧାରା ୪ ଅନୁଯାୟୀ କୌଣସି ପ୍ରକଳ୍ପରେ ଜଙ୍ଗଲ ଓ ଅଣଜଙ୍ଗଲ ଜମି ମିଶିକରି ଥିଲେ ଜଙ୍ଗଲ ଅନୁମତି ନମିଳିବା ପର୍ଯ୍ୟନ୍ତ କାର୍ଯ୍ୟାରମ୍ଭ ହୋଇପାରିବନାହିଁ।ଏହି ବନ୍ଦର ପ୍ରତିଷ୍ଠା ନିମନ୍ତେ ୨୦୦୮ମସିହା ଡିସେମ୍ବର ୨୨ତାରିଖରେ ହାଇଦ୍ରାବାଦର ନବଯୁଗ ଇଞ୍ଜିନିୟରିଂ କମ୍ପାନୀ ଲିମିଟେଡ ଓ ରାଜ୍ୟ ସରକାରଙ୍କ ମଧ୍ୟରେ ଚୁକ୍ତି ସ୍ବାକ୍ଷରିତ ହୋଇଥିଲା। କମ୍ପାନୀ ପକ୍ଷରୁ ୬, ୫୦୦କୋଟି ଟଙ୍କା ବିନିଯୋଗରେ ତିନୋଟି ପର୍ଯ୍ୟାୟରେ ବନ୍ଦର ନିର୍ମାଣ କାର୍ଯ୍ୟ ହେବାକୁ ନିଷ୍ପତି ହୋଇଥିଲା। ପ୍ରସ୍ତାବିତ ବନ୍ଦର ନିମନ୍ତେ କମ୍ପାନୀ ରାଜ୍ୟ ସରକାରଙ୍କ ଠାରୁ ୫୦୬୪.୯୬୫ ଏକର ଜମି ଅଧିଗ୍ରହଣ କରିବ। ଏଥି ମଧ୍ୟରେ ୩୩୩୨.୨୫୫ଏକର ସ୍ଥାନୀୟ ଲୋକଙ୍କ ସ୍ଥିତିବାନ ଜମି ଓ ୧୭୩୨.୭୧୦ଏକର ସରକାରୀ ଜମି ଅନ୍ତର୍ଭୂକ୍ତ।ରାଜ୍ୟରେ ପ୍ରସ୍ତାବିତ ୧୯ଟି ନୂତନ ବନ୍ଦର ମଧ୍ୟରୁ ପାରାଦୀପ,ଧାମରା ଓ ଗୋପାଳପୁର ପରେ ଅସ୍ତରଙ୍ଗ ହେବ ଚତୁର୍ଥ ବନ୍ଦର। ଅସ୍ତରଙ୍ଗ ବ୍ଲକର ଛୁରିଆନା,ଗ୍ରାମପଞ୍ଚାୟତ ର,ସହନ,ସୁଧିକେଶ୍ୱର,ଗୁଣ୍ଡଳବା,ବଳଭଦ୍ର ପୂର୍,ଛୁରିଆନା, ଡାଳୁଅକଣୀ, କଣମଣ ଓ ପାଟଳଦା ପଞ୍ଚାୟତର ସୁନ୍ଦର୍, କୁସୁମ୍ବର୍,ଆଦି ଆଉ କେତେକ ଗ୍ରାମକୁ ନେଇ କର୍ତ୍ତୃପକ୍ଷ ଜମି ଚିହ୍ନଟ କରିଛନ୍ତି।(ଦୁଃଶାସନ ନାୟକ,ଅସ୍ତରଙ୍ଗ)