ଲୁହା ତାର ଫାଶରୁ ଉଦ୍ଧାର କୃଷ୍ଣସାର ମୃଗର ମୃତ୍ୟୁ
ବୁଗୁଡା : ତା ୨୩/୦୮/୨୪ : ବୁଗୁଡା ବନାଞ୍ଚଳ ଅନ୍ତର୍ଗତ ତାଳସାକର-ବୁରୁଝୋଳା ରାସ୍ତା କଡ ବିଲରେ ବିଛା ଯାଇଥିବା ଲୁହା ତାର ଫାଶରେ ପଡି ଛଟପଟ ହେଉଥିବା ୭ ବର୍ଷର ଏକ ଅଣ୍ଡିରା କୃଷ୍ଣସାର ମୃଗକୁ ଲୋକେ ଉଦ୍ଧାର କରି ବନ ବିଭାଗକୁ ହସ୍ତାନ୍ତର କରିଥିବା ବେଳେ ତାହାର ମୃତ୍ଯୁ ଘଟିଥିବା ଜଣାଯାଇଛି । ପ୍ରକାଶ ଯେ , ଗତକାଲି ଅପରାହ୍ନରେ କୃଷ୍ଣସାର ମୃଗ ଦଳ ବିଚରଣ କରୁଥିବା ବେଳେ ସେଥି ମଧ୍ୟରୁ ଗୋଟିଏ ବିଲମାଳରେ ବିଛା ଯାଇଥିବା ତାର ଫାଶରେ ଛନ୍ଦି ହୋଇଯାଇଥିଲା । ଏହାର ସୁଯୋଗ ନେଇ ବୁଲା କୁକୁର ପଲ ଆକ୍ରମଣ କରୁଥିବା ବେଳେ ରାସ୍ତାରେ ଯାଉଥିବା ଲୋକଙ୍କ ନଜରକୁ ଆସିଥିଲା । କୁକୁର ପଲ କବଳରୁ ଏବଂ ତାର ଫାଶରୁ କୃଷ୍ଣସାର ମୃଗଟିକୁ ଉଦ୍ଧାର କରି ଲୋକେ ବନ ବିଭାଗକୁ ଖବର ଦେଇଥିଲେ । ବନ ବିଭାଗ ଘଟଣା ସ୍ଥଳରେ ପହଞ୍ଚି ଆହତ ମୃଗଟିକୁ ଆଣି ବନ ବିଭାଗ କାର୍ଯ୍ୟାଳୟରେ ଚିକିତ୍ସା କରିଥିଲେ ହେଁ ଆଜି ସକାଳେ ତାହାର ମୃତ୍ଯୁ ଘଟିଥିବା ନେଇ ବନାଞ୍ଚଳ ଅଧିକାରୀ ପ୍ରଦୀପ କୁମାର ମିଶ୍ରଙ୍କ ଠାରୁ ପ୍ରକାଶ ପାଇଛି ।
