ବ୍ରହ୍ମଲୀନ ସ୍ବାମୀଜୀଙ୍କ ସମାଧି ପ୍ରତିଷ୍ଠା ଉତ୍ସବ ଯୋଗଦେଲେ ୫୦ ରୁ ଉର୍ଦ୍ଧ୍ବ ସନ୍ୟାସୀ….
ଗୁଣୁପୁର,ରାୟଗଡା ଜିଲ୍ଲା ଗୁଣୁପୁର ପୌର ପରିଷଦ ଅନ୍ତର୍ଗତ କରାବାଙ୍କ ଠାରେ ଥିବା ଅଦ୍ୱେତ ବେଦାନ୍ତ ଆଶ୍ରମ ର ମଠାଧୀଶ ପୂଜ୍ୟ ୧୦୮ ଶ୍ରୀ ବିଦ୍ୟାନନ୍ଦ ସରସ୍ୱତୀ ସାଗର ମହାରାଜ ଙ୍କ ଗତ ଡିସେମ୍ବର ୨୨ ତାରିଖରେ ବ୍ରହ୍ମଲୀନ ଘଟିଥିଲା । ଆଜି ଷୋଡଶ ଦିବସ ପାଳନ ଅବସରରେ ଆଶ୍ରମ ପରିସରରେ ସନ୍ୟାସୀ ପରମ୍ପରା ଅନୁସାରେ ସ୍ୱାମୀଜୀଙ୍କ ପବିତ୍ର ଚିତାଭସ୍ମ କୁ ସ୍ଥାପନ କରି ସମାଧି ପ୍ରତିଷ୍ଠା କରାଯାଇଥିଲା । ଏହି ଦିବ୍ୟ କାର୍ଯ୍ୟକ୍ରମ ରେ ସାରା ଓଡ଼ିଶାର କୋଣ ଅନୁକୋଣରୁ ଆସିଥିବା ୫୦ ରୁ ଉର୍ଦ୍ଧ୍ବ ସନ୍ୟାସୀ ଯୋଗଦେଇ ପୁରାଣ ଓ ମାଳିକା ବର୍ଣ୍ଣିତ ମହେନ୍ଦ୍ରଗିରି ପାହାଡ଼ ର ପିଠାଧୀଶ ଲକ୍ଷ୍ମୀବାବା ଙ୍କ ନେତୃତ୍ୱରେ ଦିବ୍ୟ କାର୍ଯ୍ୟକ୍ରମ ପରିଚାଳନା କରିଥିଲେ । ଏହି ଅବସରରେ ଅଷ୍ଟ ପ୍ରହର ନାମ ସଂକୀର୍ତ୍ତନ, ହୋମ ଯଜ୍ଞ, ବିଷ୍ଣୁ ସହସ୍ରନାମ ପାଠ, ଭାଗବତ ପାରାୟଣ, ଅନ୍ନ ଯଜ୍ଞ, ଜ୍ଞାନ ଯଜ୍ଞ ପ୍ରଭୃତି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ବ୍ରହ୍ମଲୀନ ପରେ ପୂଜ୍ୟ ସ୍ବାମୀଜୀଙ୍କ ନାମ ପରିବର୍ତ୍ତନ କରାଯାଇ ବ୍ରହ୍ମଲୀନ ଶ୍ରୀ ଶ୍ରୀ ସ୍ୱାମୀ ବିଦ୍ୟାନନ୍ଦେସ୍ୱର ସାଗର ମହାରାଜ ରଖାଯାଇଛି । ସ୍ଥାନୀୟ ଜନସାଧାରଣ, ସ୍ବାମୀଜୀଙ୍କ ଅନୁଗାମୀଙ୍କ ସହ ପ୍ରାୟ ୨ହଜାର ଲୋକଙ୍କ ସମାଗମ ହୋଇଥିଲା ।(ସୁରେନ୍ଦ୍ର ମହାନ୍ତି )
