କାଠ ବୋଝେଇ ଗାଡି ଜବତ , ଜଣେ ଗିରଫ
ବୁଗୁଡ଼ା : ତା ୧୪/୦୫/୨୩ : ବୁଗୁଡ଼ା ବନାଞ୍ଚଳ ଅନ୍ତର୍ଗତ ଭାମଶିଆଳି ପଞ୍ଚାୟତର ଆମ୍ବିଳିଝର ନିକଟରେ ଏକ କାଠ ବୋଝେଇ ଗାଡି(ନଂ ଓଡି-୨୫-୩୪୨୯)କୁ ଭଞ୍ଜନଗର ଫରେଷ୍ଟ ମୋବାଇଲ୍ ସ୍କାର୍ଡ଼ ଜବତ କରିବା ସହ ଜଣକୁ ଗିରଫ କରିଥିବା ଜଣାଯାଇଛି । ଗିରଫ ଜଣକ ହେଲେ ବୁଗୁଡ଼ା ଥାନା ଅନ୍ତର୍ଗତ ଆଦିପୁର ଗ୍ରାମର ବିଦ୍ୟାଧର ଡାକୁଆ । ଏ ନେଇ ବନ ବିଭାଗ ପକ୍ଷରୁ କେସ୍ ନଂ ୨୯/୨୦୨୩-୨୪ରେ ଏକ ମାମଲା ରୁଜୁ କରାଯାଇଛି । ପ୍ରକାଶ ଯେ, ଆଜି ସକାଳେ ଏକ ଟାଟା ମେଜିକ୍ ଗାଡିରେ କାଠ ବୋଝେଇ ହୋଇ କତକଲା ଆଡୁ ଆସୁଥିବା ବେଳେ ଆମ୍ବିଳିଝର ମନ୍ଦିର ନିକଟରେ ମୋବାଇଲ୍ ସ୍କାର୍ଡ ହାବୁଡରେ ପଡିଥିଲା । ଗାଡି ଡ୍ରାଇଭର କୌଶଳରେ ସେଠାରୁ ଚମ୍ପଟ ମାରିଥିବା ବେଳେ ଗାଡିରେ ବସିଥିବା ବିଦ୍ଯାଧରକୁ ବନ କର୍ମଚାରୀମାନେ କାବୁ କରିବା ସହ କାଠ ବୋଝେଇ ଗାଡିକୁ ଜବତ କରିଥିଲେ । ଜବତ ଶାଗୁଆନ କାଠର ପରିମାଣ ୨୫.୭୩ ଘନଫୁଟ ହୋଇଥିବା ବେଳେ ସେଗୁଡିକର ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି ଜଣାଯାଇଛି ।
