ଗଜପତି:- ଜାତୀୟ ନବଜାତ ଶିଶୁଯତ୍ନ ସପ୍ତାହ-୨୦୨୪ ଅବସରରେ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ..

ଗଜପତି ଜିଲ୍ଲା ଗୋଷାଣୀ ବ୍ଲକ ଗୁରାଣ୍ଡି ସ୍ଥିତ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅନ୍ତର୍ଗତ ବାଘଶାଳା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ପକ୍ଷରୁ ନିକଟସ୍ଥ ଯୁବରାଜପୁର ଗ୍ରାମର ଅଙ୍ଗନବାଡ଼ି କେନ୍ଦ୍ର ପରିସରରେ ଜାତୀୟ ନବଜାତ ଶିଶୁଯତ୍ନ ସପ୍ତାହ-୨୦୨୪ ଅବସରରେ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।

ଏହି ଅବସରରେ ଅନୁଷ୍ଠିତ ସଚେତନତା ସଭା କାର୍ଯ୍ୟକ୍ରମରେ ଗୁରାଣ୍ଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ପିଏଚଇଓ:- ମମତା ପାଢ଼ୀ ଯୋଗ ଦେଇ କାର୍ଯ୍ୟକ୍ରମର ଆଭିମୁଖ୍ୟ ସମ୍ପର୍କରେ କହିବା ସହ ନିରାପତ୍ତା ଓ ଗୁଣବତ୍ତା ସହିତ ଉତ୍ତମ ସେବା ପାଇବା ପ୍ରତ୍ୟେକ ଶିଶୁର ଜନ୍ମଗତ ଅଧିକାର ବୋଲି କହିଥିଲେ ।

ସେହିଭଳି ବାଘଶାଳା ସ୍ଥିତ ଆୟୁଷ୍ମାନ ରୋଗ ମନ୍ଦିର ତଥା ପ୍ରାଥମିକ ସ୍ଵାସ୍ଥ୍ୟ କେନ୍ଦ୍ରର ଆୟୁଷ ମେଡିକାଲ ଅଫିସର ଡ଼ାଃ ରଜତ କୁମାର ସେଠୀ ଯୋଗ ଦେଇ ନବଜାତ ଶିଶୁ ଯତ୍ନର ବିଭିନ୍ନ ଦିଗ ସମ୍ପର୍କରେ କହି ଶିଶୁକୁ ଯଦି ଜ୍ଵର , କାଶ , ଦେହ ଥଣ୍ଡା , ମା କ୍ଷୀର ଖାଇ ନ ପାରିବା କି ନିସ୍ତେଜ୍ ରହିବା କି ନିଶ୍ୱାସ ପ୍ରଶ୍ୱାଶ ନେବାରେ ଅସୁବିଧା ପ୍ରଭୃତି କୌଣସି ସମସ୍ୟା କି ଲକ୍ଷଣ ଦେଖା ଦେଲେ ତୁରନ୍ତ ଆଶା କି ସ୍ବାସ୍ଥ୍ୟକର୍ମୀ ଙ୍କୁ ପରାମର୍ଶ କରି ଡାକ୍ତରଖାନାକୁ ନେବାକୁ କହିଥିଲେ । ଏଥିସହ ସରକାରୀ ଡାକ୍ତରଖାନାରେ ଶିଶୁ ମାନଙ୍କ ସମସ୍ତ ଆବଶ୍ୟକୀୟ ଚିକିତ୍ସା ମାଗଣାରେ ଉପଲବ୍ଧି ହୋଇଥାଏ ବୋଲି କହିଥିଲେ ।

ଏହି ଅବସରରେ ଯୁବରାଜପୁର ସ୍ଥିତ ଅଙ୍ଗନବାଡି କେନ୍ଦ୍ର ପରିସରରେ ମହିଳା ପ୍ରସୂତି ମାନେ ପୋଷ୍ଟର ସହ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହେବା ସହ ଦାସକାଠିଆ-ନାଚଗୀତ ମାଧ୍ୟମରେ ଶିଶୁ ଯତ୍ନ ଉପରେ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।

ଅନ୍ୟମାନଙ୍କ ମଧ୍ୟରେ ଏହି କାର୍ଯ୍ୟକ୍ରମରେ ବାଘଶାଳା ସ୍ୱାସ୍ଥ୍ୟକେନ୍ଦ୍ରର ଏଏନଏମ:- ଶ୍ରୀମତୀ ସସ୍ମିତା ରାଉତଙ୍କ ସମେତ ଆଶା ଓ ଅଙ୍ଗନବାଡି କର୍ମୀ ମାନେ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।

———————————————

ଗଣେଶ କୁମାର ରାଜୁ

ପାରଳାଖେମୁଣ୍ଡି (ଗଜପତି)

———————————————-