ରାସ୍ତା କଡ ଗଛକୁ ଧକ୍କା ଦେଲା ବସ୍ , ୧୫ରୁ ଊର୍ଦ୍ଧ୍ବ ଯାତ୍ରୀ ଆହତ….

ବୁଗୁଡ଼ା :  ବୁଗୁଡ଼ା ଥାନା ଅନ୍ତର୍ଗତ ଚଢିଆପଲ୍ଲୀ ଗ୍ରାମ ନିକଟସ୍ଥ ରାସ୍ତା ପାର୍ଶ୍ବରେ ଥିବା ଏକ ଗଛକୁ ଯାତ୍ରୀବାହୀ ବସ୍ ଧକ୍କା ଦେବା ଫଳରେ ସେଥିରେ ଥିବା ଯାତ୍ରୀମାନେ ଆହତ ହୋଇ ବୁଗୁଡ଼ା ମେଡିକାଲରେ ଭର୍ତ୍ତି ହୋଇଥିଲେ । ଘଟଣାରୁ ପ୍ରକାଶ ଯେ , ଆଜି ପୂର୍ବାହ୍ନରେ ବ୍ରହ୍ମପୁରରୁ ଭାୟା ପୁରୁଷୋତ୍ତମପୁର ହୋଇ ବୁଗୁଡ଼ା ଅଭିମୁଖେ ଆସୁଥିବା ଦକ୍ଷିଣେଶ୍ବରୀ ନାମକ ଏକ ଯାତ୍ରୀବାହୀ ବସ୍ (ନଂ-ଓଆର ୦୭ଟି ୮୮୦୦) ଭାରସାମ୍ୟ ହରାଇ ଚଢିଆପଲ୍ଲୀ ଗ୍ରାମର ରୁଟି ଫ୍ଯାକ୍ଟ୍ରି ସାମନାରେ ଥିବା ରାସ୍ତା କଡସ୍ଥ ଏକ କାକପୋଇ ଗଛକୁ ଧକ୍କା ଦେଇଥିଲା । ଫଳରେ ବସ୍ ଚାଳକ ବୋଲି କୁହାଯାଉଥିବା ବ୍ରହ୍ମପୁରର ରାଜଦୀପ୍ ମହାନ୍ତିଙ୍କ ସମେତ ସୋଲଣ୍ଡି ଗାଁର ପ୍ରମିଳା ସ୍ବାଇଁ ,ଖୋଳଖାଳିର ବାବୁଲା ପ୍ରଧାନ , ଭାମଶ୍ୟାଳିର ମୋଚିରାମ ନାହାକ , ନଗୁଡୁର ପ୍ରିୟା ଖଟୁଆ, ଭାବରଡାର କଳ୍ପନା ମହାରଣା , ଅରଖପୁରୁର ଶିଶୁଳା ପଣ୍ଡା , ବୀରଧନଞ୍ଜୟପୁର ଗାଁର ବିଷ୍ଣୁପ୍ରିୟା ବେହେରା ଓ ବସନ୍ତ ବେହେରା , ଚିରିକିପଡା ଶାସନର ନୀଳମଣି ବେହେରା , ରୋହନ ପୋଲେଇ , ପ୍ରତିମା ପୋଲେଇ, ରୁଦ୍ର ପୋଲେଇ , ନିଳାଦ୍ରୀ ଭୂୟାଁ ଓ ତନୁ ସ୍ବାଇଁଙ୍କ ସହିତ ବସର ଅନ୍ଯ ଯାତ୍ରୀଙ୍କୁ ଆହତ ଅବସ୍ଥାରେ ବୁଗୁଡ଼ା ମେଡିକାଲରେ ଭର୍ତ୍ତି କରାଯାଇଥିଲା ବେଳେ ସାମାନ୍ୟ ଆହତମାନେ ନିଜ ନିଜ ଘରକୁ ଚାଲି ଯାଇଥିଲେ । ଏ ନେଇ ଖବର ପାଇ ପୋଲିସ ଦୁର୍ଘଟଣା ସ୍ଥଳରେ ପହଞ୍ଚି ଗାଡିକୁ ନିଜ ଅକ୍ତିଆରକୁ ନେବା ସହ ମେଡିକାଲରେ ପହଞ୍ଚି ଘଟଣାର ତଦନ୍ତ କରିଥିବା ଜଣାଯାଇଛି ।