ସିତାପୁର ଗ୍ରାମରେ ଅଙ୍କାବଙ୍କା ରାସ୍ତା ଓ ବିପଜ୍ଜନକ ପୋଲ ନିର୍ମାଣ ଶୈଳୀରେ ତ୍ରୁଟି ଓ ଗାର୍ଡୱାଲ୍ ଅଭାବରୁ ପ୍ରତିଦିନ ଦୁର୍ଘଟଣା, ପ୍ରଶାସନର ହସ୍ତକ୍ଷେପ ଦାବି

ନିର୍ମାଣ ଶୈଳୀରେ ତ୍ରୁଟି ଓ ଗାର୍ଡୱାଲ୍ ଅଭାବରୁ ପ୍ରତିଦିନ ଦୁର୍ଘଟଣା, ପ୍ରଶାସନର ହସ୍ତକ୍ଷେପ ଦାବ

ସିତାପୁର: ଗଜପତି ଜିଲ୍ଲା କାଶୀନଗର ବ୍ଲକ ସିତାପୁର ଗ୍ରାମର ରେଳଟ୍ରାକ୍ ପରେ ଥିବା ରାସ୍ତା ଓ ପୋଲ ଏବେ ଯାତାୟାତ ପାଇଁ ବିପଦଜନକ ହୋଇପଡ଼ିଛି। ରାସ୍ତାଟି ଅଙ୍କାବଙ୍କା ହୋଇଥିବା ବେଳେ ପୋଲ ନିର୍ମାଣର ଶୈଳୀରେ ତ୍ରୁଟି ଥିବା ଅଭିଯୋଗ ହେଉଛି। ଏହା ସହ ପୋଲ ନିକଟରେ ଆବଶ୍ୟକୀୟ ଗାର୍ଡୱାଲ୍ ନଥିବାରୁ ଯାତାୟାତ କରୁଥିବା ଲୋକେ ବିପଦର ସମ୍ମୁଖୀନ ହେଉଛନ୍ତି।

ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ରାସ୍ତାର ବାକ୍ ଓ ପୋଲର ଗଠନ ଯୋଗୁଁ ଯାନବାହନ ଚଳାଚଳ ସମୟରେ ଦୁର୍ଘଟଣାର ଆଶଙ୍କା ରହୁଛି। ବିଶେଷକରି ରାତି ସମୟରେ ରାସ୍ତାର ସ୍ଥିତି ଅଧିକ ବିପଦଜନକ ହୋଇପଡ଼ୁଛି। ଗାର୍ଡୱାଲ୍ ନଥିବାରୁ ନିୟନ୍ତ୍ରଣ ହରାଇଥିବା ଗାଡ଼ି ପୋଲ କିମ୍ବା ରାସ୍ତା ପାର୍ଶ୍ୱରୁ ତଳକୁ ଖସିଯିବାର ଆଶଙ୍କା ମଧ୍ୟ ରହିଛି।

ଏହି ସମସ୍ୟାକୁ ନେଇ ସିତାପୁର ସରପଞ୍ଚ ତେଜେଶ୍ୱର ରାଓଙ୍କ ପକ୍ଷରୁ ପ୍ରଶାସନକୁ ବହୁବାର ଅଭିଯୋଗ କରାଯାଇଥିବା ଜଣାପଡ଼ିଛି। ରାସ୍ତା ଓ ପୋଲର ସ୍ଥିତି ଅନୁଧ୍ୟାନ କରି ଆବଶ୍ୟକ ସୁଧାରମୂଳକ ପଦକ୍ଷେପ ନେବା ସହ ପୋଲ ନିକଟରେ ଗାର୍ଡୱାଲ୍ ନିର୍ମାଣ କରିବାକୁ ସରପଞ୍ଚ ଦାବି କରିଛନ୍ତି।

ସ୍ଥାନୀୟ ଗ୍ରାମବାସୀମାନେ ମଧ୍ୟ ତୁରନ୍ତ ସମସ୍ୟାର ସମାଧାନ ଦାବି କରିଛନ୍ତି। ଦୁର୍ଘଟଣା ଘଟିବା ପରେ ପଦକ୍ଷେପ ନେବା ବଦଳରେ ପୂର୍ବରୁ ରାସ୍ତାର ତ୍ରୁଟି ସୁଧାରିବା, ଆବଶ୍ୟକ ସ୍ଥାନରେ ଗାର୍ଡୱାଲ୍ ଓ ସୁରକ୍ଷା ବ୍ୟବସ୍ଥା କରିବାକୁ ସେମାନେ ପ୍ରଶାସନ ନିକଟରେ ଦାବି ରଖିଛନ୍ତି।

ବାରମ୍ବାର ଅଭିଯୋଗ ସତ୍ତ୍ୱେ ସମସ୍ୟାର ସ୍ଥାୟୀ ସମାଧାନ ନହେବାରୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ୁଛି। ଆଗାମୀ ଦିନରେ କୌଣସି ବଡ଼ ଅଘଟଣ ଘଟିବା ପୂର୍ବରୁ ସମ୍ପୃକ୍ତ ବିଭାଗ ଘଟଣାସ୍ଥଳ ପରିଦର୍ଶନ କରି ରାସ୍ତା ଓ ପୋଲର ତ୍ରୁଟି ଯାଞ୍ଚ କରିବା ସହ ଆବଶ୍ୟକ ସୁରକ୍ଷାମୂଳକ କାର୍ଯ୍ୟ କରିବାକୁ ଗ୍ରାମବାସୀ ଦାବି କରିଛନ୍ତି।