ଭୂସ୍ଖଳନ ଯୋଗୁଁ ଟ୍ରେନ୍ ଚଳାଚଳ ପ୍ରଭାବିତ କୋରାପୁଟ–ରାୟଗଡ଼ା ରୁଟ୍ରେ ବାତିଲ୍ ଓ ରୁଟ୍ ପରିବର୍ତ୍ତନ
କୋରାପୁଟ, ୨୭/୦୯ (ଗୁପ୍ତେଶ୍ୱର ରଥ): ପ୍ରବଳ ବର୍ଷା ଯୋଗୁଁ ରାୟଗଡ଼ା ରେଳ ଡିଭିଜନ୍ ଅନ୍ତର୍ଗତ ମାଲିଗୁଡ଼ା ଓ ଛତରୀପୁଟ ରେଳ ଷ୍ଟେସନ୍ ମଧ୍ୟରେ ବଡ଼ ଧରଣର ଭୂସ୍ଖଳନ ଘଟିଛି। ପାହାଡ଼ରୁ ବହୁ ପରିମାଣରେ ମାଟି, ବଡ଼ ବଡ଼ ପଥର ଓ ଗଛ ରେଳଧାରଣା ଉପରେ ଭସି ଆସି ପଡ଼ିବା ଫଳରେ ଏହି ରେଳପଥରେ ଟ୍ରେନ୍ ଚଳାଚଳ ଗୁରୁତର ଭାବେ ବାଧାପ୍ରାପ୍ତ ହୋଇଛି। ଭୂସ୍ଖଳନ ଯୋଗୁଁ ରେଳଧାରଣା ଉପରେ ମାଟି ଓ ପଥର ଜମା ହୋଇଥିବାରୁ ରେଳବାଇ ପକ୍ଷରୁ ଯାତ୍ରୀଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦିଆଯାଇଛି। ଘଟଣା ପରେ ରେଳବାଇର ଉଦ୍ଧାର ଓ ରକ୍ଷଣାବେକ୍ଷଣ ଦଳ ଘଟଣାସ୍ଥଳରେ ପହଞ୍ଚି ରେଳଧାରଣାରୁ ମାଟି, ପଥର ଓ ଗଛ ହଟାଇବା ସହ ରେଳପଥକୁ ସୁରକ୍ଷିତ କରିବା ପାଇଁ ଯୁଦ୍ଧକାଳୀନ ଭିତ୍ତିରେ କାମ ଆରମ୍ଭ କରିଛନ୍ତି। ଏହି ଘଟଣାର ପ୍ରଭାବ କୋରାପୁଟ–ରାୟଗଡ଼ା ରୁଟ୍ରେ ଟ୍ରେନ୍ ଚଳାଚଳ ଉପରେ ପଡ଼ିଛି। ଯାତ୍ରୀଙ୍କ ସୁରକ୍ଷା ଓ ରେଳପଥର ସ୍ଥିତିକୁ ଦୃଷ୍ଟିରେ ରଖି ରେଳବାଇ କର୍ତ୍ତୃପକ୍ଷ କେତେକ ଟ୍ରେନ୍କୁ ବାତିଲ୍ କରିଥିବା ବେଳେ ଅନ୍ୟ କେତେକ ଟ୍ରେନ୍ର ଯାତ୍ରାପଥ ପରିବର୍ତ୍ତନ କରି ଚଳାଚଳ କରାଯାଉଛି। ଏହା ଫଳରେ କୋରାପୁଟ, ରାୟଗଡ଼ା ଓ ଏହି ରେଳପଥରେ ଯାତାୟାତ କରୁଥିବା ଅନେକ ଯାତ୍ରୀ ଅସୁବିଧାର ସମ୍ମୁଖୀନ ହୋଇଛନ୍ତି। ବାତିଲ୍ ଓ ରୁଟ୍ ପରିବର୍ତ୍ତନ ହୋଇଥିବା ଟ୍ରେନ୍ ସମ୍ପର୍କରେ ଯାତ୍ରୀମାନେ ରେଳବାଇର ଅଧିକାରିକ ସୂଚନା ଯାଞ୍ଚ କରି ଯାତ୍ରା କରିବାକୁ କୁହାଯାଇଛି। ଭୂସ୍ଖଳନ ଯୋଗୁଁ ପାହାଡ଼ିଆ ଅଞ୍ଚଳରେ ରେଳପଥର ସୁରକ୍ଷା ନେଇ ମଧ୍ୟ ରେଳବାଇ ପକ୍ଷରୁ ନଜର ରଖାଯାଉଛି। ରେଳଧାରଣାରୁ ସମସ୍ତ ବାଧା ହଟାଇ ରେଳପଥକୁ ସୁରକ୍ଷିତ ଘୋଷଣା କରାଯିବା ପରେ ହିଁ ସ୍ୱାଭାବିକ ଭାବେ ଟ୍ରେନ୍ ଚଳାଚଳ ଆରମ୍ଭ ହେବ ବୋଲି ଜଣାପଡ଼ିଛି।
