ବାଇକ୍ ଦୁର୍ଘଟଣାରେ ଦମ୍ପତି ଗୁରୁତର 

ବୁଗୁଡା : ତା ୨୬/୦୮/୨୪ : ବୁଗୁଡା ଉପକଣ୍ଠସ୍ଥ ତାରୁଟାଙ୍କି ନିକଟରେ ବାଇକ୍ ଦୁର୍ଘଟଣାରେ ସ୍ବାମୀ ଓ ସ୍ତ୍ରୀ ଗୁରୁତର ହୋଇଥିବା ଜଣାଯାଇଛି । ଗୁରୁତର ଦୁହେଁ ହେଲେ ବି.ବ୍ରହ୍ମପୁର ଗ୍ରାମର ସନ୍ତୋଷ ପଣ୍ଡା ଓ ତାଙ୍କର ପତ୍ନୀ ନମିତା ପଣ୍ଡା । ପ୍ରକାଶ ଯେ , ଆଜି ସନ୍ଧ୍ୟାରେ ସ୍ବାମୀ ଓ ସ୍ତ୍ରୀ ଦୁହେଁ ବାଇକରେ ବି.ବ୍ରହ୍ମପୁର ଗାଁକୁ ଯାଉଥିବା ବେଳେ ସାଇକେଲ ଚଳାଇ ଆଗରେ ଯାଉଥିବା ପଙ୍କଳସାହି ଗାଁର ବୃଦ୍ଧ ବଂଶୀ ନାଇକଙ୍କୁ ପଛପଟୁ ଧକ୍କା ଦେଇଥିଲେ । ଦୁର୍ଘଟଣାରେ ତିନିହେଁ ଆହତ ହୋଇଥିଲା ବେଳେ ସେମାନଙ୍କୁ ସେଠାରୁ ଉଦ୍ଧାର କରାଯାଇ ବୁଗୁଡା ମେଡିକାଲକୁ ଅଣାଯାଇଥିଲା । ବୃଦ୍ଧ ବଂଶୀଙ୍କ ବାମ ପାଦ ଆଙ୍ଗୁଠି ଓ ପିଠିରେ ସାମାନ୍ୟ ଆଘାତ ଲାଗିଥିବା ବେଳେ ସନ୍ତୋଷଙ୍କ ମୁହଁରେ ଆଘାତ ଲାଗିଥିଲା ଏବଂ ନମିତାଙ୍କ ଡାହାଣ ହାତ ଭାଙ୍ଗି ଯାଇଥିଲା । ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ଥିବାରୁ ଉଭୟଙ୍କୁ ବ୍ରହ୍ମପୁରକୁ ସ୍ଥାନାନ୍ତର କରାଯାଇଥିଲା ।