ଲୋକେଶ୍ୱରପୁରରେ ଭକ୍ତିମୟ ପରିବେଶରେ ବାହୁଡ଼ା ଯାତ୍ରା ସମାପନ; ତିନି କିଲୋମିଟର ଧରି ରଥ ଟାଣିଲେ ଶ୍ରଦ୍ଧାଳୁ
ଖୋର୍ଦ୍ଧା, ( ପ୍ରିୟଙ୍କା ମହାପାତ୍ର): ଖୋର୍ଦ୍ଧା ସହର ନିକଟସ୍ଥ ଲୋକେଶ୍ୱରପୁର ଗ୍ରାମରେ ଶ୍ରୀଜଗନ୍ନାଥ ମହାପ୍ରଭୁଙ୍କ ପବିତ୍ର ବାହୁଡ଼ା ଯାତ୍ରା ଭକ୍ତି, ଶ୍ରଦ୍ଧା ଓ ଉତ୍ସାହର ସହ ପାଳିତ ହୋଇଯାଇଛି। ଗ୍ରାମ ସମେତ ଆଖପାଖ ଅଞ୍ଚଳରୁ ହଜାର ହଜାର ଶ୍ରଦ୍ଧାଳୁ ଏହି ଅବସରରେ ସାମିଲ ହୋଇ ମହାପ୍ରଭୁଙ୍କ ଦର୍ଶନ କରିବା ସହ ରଥ ଟାଣି ପୁଣ୍ୟ ଲାଭ କରିଥିଲେ। ସମଗ୍ର ଅଞ୍ଚଳ ହରିବୋଲ, ଜୟ ଜଗନ୍ନାଥ ଧ୍ୱନି ଓ ଭକ୍ତିମୟ ପରିବେଶରେ ମୁଖରିତ ହୋଇଉଠିଥିଲା। ଗତ ଆଠ ଦିନ ଧରି ପ୍ରତିଦିନ ସନ୍ଧ୍ୟାବେଳେ ଭଜନ, କୀର୍ତ୍ତନ, ନାମ ସଙ୍କୀର୍ତ୍ତନ ଓ ଧାର୍ମିକ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଗ୍ରାମବାସୀ ଓ ଭକ୍ତମାନଙ୍କ ସକ୍ରିୟ ସହଭାଗିତାରେ ପ୍ରତିଦିନର କାର୍ଯ୍ୟକ୍ରମ ଭକ୍ତିମୟ ପରିବେଶ ସୃଷ୍ଟି କରିଥିଲା। ମହାପ୍ରଭୁଙ୍କ ପ୍ରତି ଅଗାଧ ଭକ୍ତିଭାବ ପ୍ରକାଶ କରିବା ପାଇଁ ଦୂରଦୂରାନ୍ତରୁ ମଧ୍ୟ ଭକ୍ତମାନେ ଲୋକେଶ୍ୱରପୁରରେ ପହଞ୍ଚିଥିଲେ। ଶୁକ୍ରବାର ସମସ୍ତ ନୀତିକାନ୍ତି ସମାପନ ପରେ ଚତୁର୍ଦ୍ଧାମୂର୍ତ୍ତିଙ୍କୁ ବିଧିବଦ୍ଧ ଭାବେ ରଥାରୂଢ଼ କରାଯାଇଥିଲା। ପରେ ବୈଦିକ ମନ୍ତ୍ରୋଚ୍ଚାରଣ, ଘଣ୍ଟ, ଶଙ୍ଖ ଓ ହୁଳହୁଳି ଧ୍ୱନି ମଧ୍ୟରେ ରଥଟଣା ଆରମ୍ଭ ହୋଇଥିଲା। ଶ୍ରଦ୍ଧାଳୁମାନେ ପ୍ରାୟ ତିନି କିଲୋମିଟର ଧରି ରଥ ଟାଣି ମହାପ୍ରଭୁଙ୍କ ପ୍ରତି ନିଜର ଅଗାଧ ଭକ୍ତି ପ୍ରକାଶ କରିଥିଲେ। ମହିଳା, ପୁରୁଷ, ବୃଦ୍ଧ ଓ ଯୁବବର୍ଗଙ୍କ ଉତ୍ସାହପୂର୍ଣ୍ଣ ସହଭାଗିତା ଯାତ୍ରାକୁ ଆହୁରି ଆକର୍ଷଣୀୟ କରିଥିଲା।
ବହୁ ସଂଖ୍ୟାରେ ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ଖୋର୍ଦ୍ଧା ଆଦର୍ଶ ଥାନା ପକ୍ଷରୁ ପର୍ଯ୍ୟାପ୍ତ ପୁଲିସ ବଳ ମୁତୟନ କରାଯାଇଥିଲା। ସୁରକ୍ଷା ବ୍ୟବସ୍ଥା ସହ ଯାତାୟାତ ନିୟନ୍ତ୍ରଣ ଓ ଶାନ୍ତିଶୃଙ୍ଖଳା ବଜାୟ ରଖିବା ପାଇଁ ପୁଲିସ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା କରାଯାଇଥିଲା। ଏହାଫଳରେ ସମଗ୍ର ବାହୁଡ଼ା ଯାତ୍ରା ନିର୍ବିଘ୍ନ ଓ ଶାନ୍ତିପୂର୍ଣ୍ଣ ଭାବେ ସମାପ୍ତ ହୋଇଥିଲା।ରଥଯାତ୍ରା ପରିଚାଳନା କମିଟିର ସଦସ୍ୟ ଅମ୍ବିକା ପ୍ରସାଦ ଦାସ, ରମେଶ ମୁଦୁଲି, ପ୍ରଫୁଲ୍ଲ ମୁଦୁଲି, କାଳିଆ ମୁଦୁଲି, ସିନ, କୁନା, ଶଙ୍କରା ଓ ମହେଶ୍ୱର ମହାରଣାଙ୍କ ସମେତ ଅନ୍ୟ ସଦସ୍ୟମାନେ ଯାତ୍ରାର ସଫଳ ଆୟୋଜନରେ ସକ୍ରିୟ ଭୂମିକା ନେଇଥିଲେ। ସେମାନଙ୍କ ସୁଚାରୁ ପରିଚାଳନା ଓ ଗ୍ରାମବାସୀଙ୍କ ସହଯୋଗରେ ବାହୁଡ଼ା ଯାତ୍ରା ସୁରୁଖୁରୁରେ ସମ୍ପନ୍ନ ହୋଇଥିଲା।
ଭକ୍ତମାନଙ୍କ ମତରେ, ଲୋକେଶ୍ୱରପୁରର ବାହୁଡ଼ା ଯାତ୍ରା କେବଳ ଏକ ଧାର୍ମିକ ପର୍ବ ନୁହେଁ, ବରଂ ସାମାଜିକ ସମନ୍ୱୟ, ଭ୍ରାତୃତ୍ୱ ଓ ସାମୂହିକ ଐକ୍ୟର ଏକ ଅନନ୍ୟ ପ୍ରତୀକ। ପ୍ରତିବର୍ଷ ଏହି ଯାତ୍ରାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ବିଶେଷ ଉତ୍ସାହ ପରିଲକ୍ଷିତ ହୋଇଥାଏ ଏବଂ ଚଳିତ ବର୍ଷ ମଧ୍ୟ ସେହି ପରମ୍ପରା ଅବ୍ୟାହତ ରହିଥିଲା।
