ରାମଲାଲାଙ୍କ ପ୍ରାଣ ପ୍ରତିଷ୍ଠାକୁ ନେଇ ରାମନାଗୁଡା ଉତ୍ସବ ମୁଖର…
ରାମନାଗୁଡା ରାୟଗଡ଼ା ଜିଲ୍ଲା ରାମନାଗୁଡା ଠାରେ ପ୍ରଭୁ ଶ୍ରୀରାମଲାଲାଙ୍କ ପ୍ରାଣ ପ୍ରତିଷ୍ଠା ଉତ୍ସବରେ ରାମନାଗୁଡା ଚଳଚଞ୍ଚଳ ହୋଇଉଠିଛି । ଘରେ ଘରେ ପୂର୍ଣ୍ଣ କୁମ୍ଭ ସହ ଛାତରେ ଶ୍ରୀରାମ ବାନା ଉଡ଼ାଯାଇଛି । ସକାଳ ୭ଟାରେ ରାମନାଗୁଡା ରାମମନ୍ଦିର ପରିସରରେ ଗ୍ରାମବାସୀଙ୍କ ସହଯୋଗରେ ଶ୍ରୀରାମ ମହାଯଜ୍ଞ, ରାମଚରିତ ମାନସ, ରାମାୟଣ କାଣ୍ଡ ପଠନ, ହନୁମାନ ଚାଳିଶା ଓ ପବିତ୍ର ରାମାନାମ ବିଜୟ ମନ୍ତ୍ରପାଠ ଆରମ୍ଭ ହୋଇଥିଲା। କୀର୍ତ୍ତନ ମଣ୍ଡଳୀ ମନ୍ଦିର ପରିକ୍ରମା କରିବା ସହ ନଗର କୀର୍ତ୍ତନ କରିବା ସହିତ ରାମନାମ ସଙ୍କୀର୍ତ୍ତନ କରିଥିଲେ। ଭକ୍ତ ମାନେ ପ୍ରଭୁଙ୍କ ପାଦପଦ୍ମେ ଭକ୍ତି ପୁଷ୍ପାଞ୍ଜଳି ଦେବାସହ ପ୍ରଦୀପ ପ୍ରଜ୍ୱଳିତ କରିଥିଲେ । ସେହିପରି ରାମ ମନ୍ଦିର ପରିସରରେ ଶ୍ରୀରାମ ନାମଯଜ୍ଞ ସହ ଅନ୍ନଭୋଗ ବଣ୍ଟା ଯାଇଥିଲା । ସ୍ଥାନୀୟ ଯୁବକ ମାନଙ୍କ ଦ୍ବାରା ଏକ ବିଶାଳ ଶୋଭାଯାତ୍ରା ହନୁମାନ ମନ୍ଦିର ଠାରୁ ବ୍ଲକ ଅଫିସ ପର୍ଯ୍ୟନ୍ତ ଜୟ ଶ୍ରୀରାମ ନାରା ସହ ବାହାରିଥିଲା। ଏହି କାର୍ଯ୍ୟକ୍ରମକୁ ଅଞ୍ଚଳର ଶ୍ରୀରାମ ଭକ୍ତ ଓ କାର୍ଯ୍ୟକର୍ତ୍ତା ମାନେ ସହଯୋଗ କରିଥିଲେ ।
(ରିପୋର୍ଟ ସଞ୍ଜିବ କୁମାର ଦାଶ)
