ନବରାତ୍ର ପୂଜା ଉପଲକ୍ଷେ ମା ସାରଳା ଙ୍କ ଦାଣ୍ଡଯାତ୍ରା ପର୍ବର ଶୁଭାରମ୍ଭ

ନବରାତ୍ର ପୂଜା ଉପଲକ୍ଷେ ମା ସାରଳା ଙ୍କ ଦାଣ୍ଡଯାତ୍ରା ପର୍ବର ଶୁଭାରମ୍ଭ
==================== ତିର୍ତ୍ତୋଲ :- ପ୍ରସିଦ୍ଧ ଝଙ୍କଡ଼ର ଅଧିଷ୍ଠାତ୍ରୀ ଦେବୀ ମା ଶାରଳା ଠାକୁରାଣୀ ଙ୍କ ସାର୍ବଜନୀନ ଶାରଦୀୟ ପାର୍ବଣ ପୂଜା ଗତ ଅକ୍ଟୋବର ୬ ତାରିଖ ଶୁକ୍ରବାର ମୂଳାଷ୍ଟମୀ ଠାରୁ ଆରମ୍ଭ ହୋଇଥିବା ବେଳେ , ଅକ୍ଟୋବର ୧୫ ତାରିଖ ରବିବାର ଠାରୁ ନବରାତ୍ର ପୂଜାର ଶୁଭାରମ୍ଭ ହୋଇଛି। ଏହି ଉପଲକ୍ଷେ ସନ୍ଧ୍ୟାରେ ଶୈଳପୁତ୍ରୀ ବେଶରେ , ମାଆ ଶ୍ରଦ୍ଧାଳୁ ଭକ୍ତମାନଙ୍କୁ ଦର୍ଶନ ଦେବା ପରେ ରାତ୍ର ୧୦ ଟା ବେଳେ, ଏକ ବର୍ଣ୍ଣାଢ୍ୟ ଶୋଭାଯାତ୍ରାରେ ପାଚିରୀକଣ ବାଟ ପର୍ଯ୍ୟନ୍ତ ଯାତ୍ରାକରି , ସ୍ୱପୀଠ କୁ ପ୍ରତ୍ୟାବର୍ତ୍ତନ କରିଥିଲେ । ଏହିପରି ପ୍ରତିଦିନ ରାତିରେ ମାଆଙ୍କର ଏହି ଦାଣ୍ଡଯାତ୍ରା ବା ନଗର ପରିକ୍ରମା ଉପଲକ୍ଷେ ମାଆଙ୍କ ଚଳନ୍ତି ପ୍ରତିମା , ବିଜେ ପ୍ରତିମା ଙ୍କୁ ଏକ ସୁସଜ୍ଜିତ ମଣୀମୟ ବିମାନ ଆରୋହଣ କରାଯାଏ । ସମ୍ମୁଖରେ ଚାମର ଆଲଟ ପଡ଼ୁଥାଏ , ବନ୍ଦିଆ ଜଳୁଥାଏ , ଘଣ୍ଟ ଘଣ୍ଟା କାହାଳୀ , ଭେରୀ ତୁରୀ ଢ଼ୋଲ୍ ମହୁରୀ , ନାମସଙ୍କୀର୍ତ୍ତନ, ଓ ହରିବୋଲ ହୁଳହୁଳି ଧ୍ବନି ରେ ଝଙ୍କଡ଼ର ଗାଁ ଦାଣ୍ଡ ପ୍ରକମ୍ପିତ ହୋଇଉଠେ । ତେବେ ଏହି ଦାଣ୍ଡ ଯାତ୍ରାରେ ପ୍ରଥମଦିନ ପାଚିରୀ କଣ ବାଟ , ୨ ୟ ଦିନ ଗୋବିନ୍ଦଜୀଉ ଙ୍କ ମଠ , ୩ ୟ ଦିନ ଗୋପାଳ ମାନଙ୍କ ଗୋଠ , ୪ ର୍ଥ ଦିନ ସାରଳା ପର୍ଶୁରାମ ଭେଟ , ୫ ମ ଦିନ ଗୁପ୍ତ ଚନ୍ଦ୍ରଭାଗା ନଦୀର ବିଶ୍ବମ୍ବର ଘାଟ ଓ ଷଷ୍ଠ ଦିନ ଠାରୁ ଦଶହରା ପର୍ଯ୍ୟନ୍ତ, ମାଆଙ୍କ ପ୍ରାଚୀନ ପୀଠସ୍ଥଳୀ ବଡ଼ଶାରୋଳ ଗ୍ରାମର ଲଣ୍ଡାଦେଉଳ ପୀଠ କୁ ଯାତ୍ରା କରି , ସେଠାରେ ପୂଜାର୍ଚ୍ଚନା ପାଇବା ପରେ ସ୍ଵପୀଠ କୁ ଫେରି ଆସିଥାଆନ୍ତି ।ଏହି ଦାଣ୍ଡଯାତ୍ରା ରେ ମାଆ ନିଜେ ସିଂହାସନ ଛାଡି, ନିଜର ସନ୍ତାନ ଓ ସମସ୍ତ ଶ୍ରଦ୍ଧାଳୁ ଭକ୍ତମାନଙ୍କୁ ଦର୍ଶନ ଦେବା ନିମନ୍ତେ ଛୁଟିଆସିଥାଆନ୍ତି । ତେଣୁ ମନ୍ଦିର କୁ ଯାଇ ପାରୁନଥିବା ସନ୍ତାନ ମାନଙ୍କ ପାଇଁ ଦର୍ଶନ ଦେବା ପାଇଁ , ସନ୍ତାନବତ୍ସଲା ମାଆ ସାରଳା ଙ୍କ ଇଚ୍ଛାରେ ହିଁ ଏହି ଦାଣ୍ଡ ଯାତ୍ରା ବା ନଗରପରିକ୍ରମା ପର୍ବ କେଉଁ ଆବହମାନ କାଳରୁ ପ୍ରଚଳିତ ହୋଇ ଆସୁଅଛି।
ଜଗତସିଂହପୁର ରୁ ଶରତ କୁମାର ଦାଶଙ୍କ ରିପୋର୍ଟ ନ୍ୟୁଜ ଉପାନ୍ତ ଓଡିଶା