୨ ବାଇକ୍ ମୁହାଁମୁହିଁ ଧକ୍କା , ୩ ଗୁରୁତର…

ବୁଗୁଡା : ତା ୧୫/୦୩/୨୪ : ବୁଗୁଡା ଥାନା ଅନ୍ତର୍ଗତ ବିରଞ୍ଚିପୁର ଗାଁ ଛକଠୁ ଅଳ୍ପ ଦୂରରେ ଦୁଇ ବାଇକ୍ ମୁହାଁମୁହିଁ ଧକ୍କା ହେବା ଫଳରେ ୪ ଜଣ ଆହତଙ୍କ ମଧ୍ଯରୁ ୩ ଜଣଙ୍କୁ ଗୁରୁତର ଅବସ୍ଥାରେ ବ୍ରହ୍ମପୁରକୁ ସ୍ଥାନାନ୍ତର ହୋଇଥିବା ଜଣାଯାଇଛି ।
ଦୁର୍ଘଟଣାରେ ପୋଲସରା ଥାନା ଅନ୍ତର୍ଗତ ଲୁଣିଆପଡା ଗ୍ରାମର ଧର୍ମେନ୍ଦ୍ର ବିଷୋୟୀ ଓ ସୁଜିତ ନାୟକ , ଜଗନ୍ନାଥ ପ୍ରସାଦ ଥାନା ଅନ୍ତର୍ଗତ କମସରଗଡ ଗାଁର ନାରାୟଣ ସାହୁ ଗୁରୁତର ହୋଇଥିବା ଓ କାହ୍ନୁ ଚରଣ ସାହୁ ସାମାନ୍ୟ ଆହତ ହୋଇଥିଲେ । ପ୍ରକାଶ ଯେ , ଦୁଇ ଭାଇ ନାରାୟଣ ଓ କାହ୍ନୁ ବାଇକ୍ ଯୋଗେ ତାଙ୍କର ଗାଁ କମସରଗଡକୁ ଯାଉଥିବା ବେଳେ ଧର୍ମେନ୍ଦ୍ର ଓ ସୁଜିତ ଏକ ବାଇକରେ ନିଜ ଗାଁ ଲୁଣିଆପଡାକୁ ଫେରୁଥିଲେ । ବରଡିପଲ୍ଲୀ ଓ ବିରଞ୍ଚିପୁର ଗାଁ ରାସ୍ତା ମଝିରେ ଉଭୟ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା । ଫଳରେ ସମସ୍ତ ବାଇକ୍ ଆରୋହୀ ଖଣ୍ଡିଆ ଖାବରା ହୋଇ ରକ୍ତ ଜୁଡୁବୁଡୁ ଅବସ୍ଥାରେ ଦୁର୍ଘଟଣା ସ୍ଥଳରେ ପଡି ରହିଥିଲେ । ଖବର ପାଇ ଦମକଳବାହିନୀ ସେଠାରେ ପହଞ୍ଚି ସେମାନଙ୍କୁ ଉଦ୍ଧାର କରି ବୁଗୁଡା ମେଡିକାଲକୁ ଆଣିଥିଲେ । ଦୁର୍ଘଟଣରେ ଧର୍ମେନ୍ଦ୍ରଙ୍କ ବାମ ଗୋଡ ଭାଙ୍ଗିଯିବା ସହ ମୁହଁରେ ଆଘାତ ଲାଗିଥିଲା ବେଳେ ନାରାୟଣ ଓ ସୁଜିତଙ୍କ ମୁଣ୍ଡରେ ଗଭୀର ଆଘାତ ଏବଂ କାହ୍ନୁଙ୍କ ମୁହଁରେ ସାମାନ୍ୟ ଆଘାତ ଲାଗିଥିଲା । ପ୍ରାଥମିକ ଚିକିତ୍ସା ପରେ ଗୁରୁତର ତିନିହେଁଙ୍କୁ ୧୦୮ ଆମ୍ବୁଲାନ୍ସ ଯୋଗେ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରାଯାଇଥିଲା ବେଳେ ପୋଲିସ ଦୁର୍ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ କରୁଥିବା ଜଣାଯାଇଛି ।