ନିଜ ପରିବାର କୁ ଫେରିଲେ ଅଜଣା ନିଖୋଜ ବ୍ୟକ୍ତି ଗୁଣୁପୁର,-(ସୁରେନ୍ଦ୍ର ମହାନ୍ତି )ନିଖୋଜ ହେବାର ସାତ ଦିନ ପରେ ନିଜ

ନିଜ ପରିବାର କୁ ଫେରିଲେ ଅଜଣା ନିଖୋଜ ବ୍ୟକ୍ତି

ଗୁଣୁପୁର,-(ସୁରେନ୍ଦ୍ର ମହାନ୍ତି )ନିଖୋଜ ହେବାର ସାତ ଦିନ ପରେ ନିଜ ପରିବାର କୁ ଫେରିପାଇଛନ୍ତି ଜଣେ ଅଜଣା ଅଶୁଣା ମୁସଲମାନ ସମ୍ପ୍ରଦାୟର ବୟସ୍କ ବ୍ୟକ୍ତି । ଏହା ସମ୍ଭବ ହୋଇ ପାରିଛି ଗୁଣୁପୁର ବ୍ଲକ୍ ଲିମାମେଡା ଗ୍ରାମର ଯୁବ ସାମାଜିକ କର୍ମୀ ଅଜିତ୍ ମହାନ୍ତି ଙ୍କ ପାଇଁ । ଗତ ଜନ୍ମାଷ୍ଟମୀ ୬ ତାରିଖ ସକାଳେ ଜଣେ ବୟସ୍କ ବ୍ୟକ୍ତି ଏଣେତେଣେ ସନ୍ଦେହଜନକ ଭାବେ ବୁଲୁଥିବା ଦେଖି ମୁଖ୍ୟ ରାସ୍ତା ପାର୍ଶ୍ଵରେ ଦୋକାନ କରିଥିବା ଗ୍ରାମର ହିମାଂଶୁ ଶେଖର ଓ ସଞ୍ଜରେଖା ଦେବୀ ଶ୍ରୀ ମହାନ୍ତି ଙ୍କୁ ଜଣାଇଥିଲେ । ତୁରନ୍ତ ଉକ୍ତ ବ୍ୟକ୍ତିଙ୍କୁ ନିକଟସ୍ଥ ଜଙ୍ଗଲ ରାସ୍ତାରୁ ଉଦ୍ଧାର କରି ବାଳ ନିକେତନ ଅତିରିକ୍ତ ଆଶ୍ରୟ ଗୃହରେ ରଖାଯାଇଥିଲା । ଉକ୍ତ ବ୍ୟକ୍ତି ଜଣକୁ ପାଣି ଓ ଖାଦ୍ୟ ଦେବାପରେ ସେ ତାଙ୍କ ନାମ ବ୍ୟତିତ ଅନ୍ୟ କୌଣସି ସୂଚନା ଦେବାରେ ବିଫଳ ହୋଇଥିଲେ । ତାଙ୍କ ପାଖରେ କେବଳ ଏକ ଟ୍ରେନ ଟିକେଟ ଓ ସୁଇଚ ଅଫ ଛୋଟିଆ ମୋବାଇଲ ବ୍ୟତୀତ ଆଉ କିଛି ନଥିଲା । ଦୀର୍ଘ ଦୁଇଘଣ୍ଟା ପରେ ଉକ୍ତ ମୋବାଇଲ ରୁ ଏକ ନମ୍ବର ବାହାର କରି ଅନୁସନ୍ଧାନ କରିବାରୁ ବ୍ୟକ୍ତି ଜଣକ ଆସାମ ରାଜ୍ୟର ଡ୍ର।ଙ୍ଗ ଜିଲ୍ଲାର ଗଲେନ ବଗିଶା ଗ୍ରାମର ବୋଲି ଜଣାପଡିଥିଲା । ନିଜ ଝିଅ ଘର ବେଙ୍ଗାଳୁରୁ ଯାଉଥିବା ବେଳେ ଗତ ଦୁଇ ତାରିଖରୁ ସେ ନିଖୋଜ ଥିବା ତାଙ୍କ ପରିବାର ଲୋକେ ସୂଚନା ଦେଇଥିଲେ । ଆଜି ତାଙ୍କ ପରିବାର ଲୋକେ ଗୁଣୁପୁର ପହଞ୍ଚି ଉକ୍ତ ବ୍ୟକ୍ତି ନଇଁ ବଲି (୫୫)ଙ୍କୁ ସାଙ୍ଗରେ ଧରି ଫେରି ଯାଇଛନ୍ତି । ନିଖୋଜ ବ୍ୟକ୍ତି ଜଣକ ଅମାୟିକ ଓ ବୋକା ଧରଣର ବୋଲି ସେମାନେ କହିଛନ୍ତି । ଏଭଳି ବ୍ୟକ୍ତି ଙ୍କୁ ଆଶ୍ରୟ ଦେଇ ସୁରକ୍ଷିତ ଭାବେ ଫେରିପାଇ ଥିବାରୁ ଅନୁଷ୍ଠାନ କର୍ତ୍ତୃପକ୍ଷ ଙ୍କୁ କୃତଜ୍ଞତା ଜ୍ଞାପନ କରିଥିଲେ ।