ସୁପ୍ରିମୋଙ୍କ ସ୍କାନରରେ ସାଂସଦ ସସ୍ମିତ ପାତ୍ର
*ସୁପ୍ରିମୋଙ୍କ ସ୍କାନରରେ ସାଂସଦ ସସ୍ମିତ ପାତ୍ର । ରାଜ୍ୟସଭାରେ ୱାକଫ୍ ବିଲ ସମର୍ଥନରେ ବିଜେଡି ସାଂସଦଙ୍କ ଭୋଟ ପ୍ରସଙ୍ଗକୁ ନେଇ ବିବାଦ ଭିତରେ ଶୁକ୍ରବାର ସୁପ୍ରିମୋଙ୍କୁ ଭେଟିଛନ୍ତି ଦଳର ବରିଷ୍ଠ ନେତା । ବିଜେଡି ଅନ୍ଦର ମହଲରୁ ମିଳିଥିବା ସୂଚନା ଅନୁସାରେ, ନବୀନଙ୍କୁ ଭେଟି ବରିଷ୍ଠ ନେତା ସସ୍ମିତ ପାତ୍ରଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି । ଖାଲି ଏତିକି ନୁହେଁ ସଂସଦୀୟ ଦଳ ନେତା ପଦରୁ ସସ୍ମିତ ପାତ୍ରଙ୍କୁ ବାହାର କରିବାକୁ ପ୍ରସ୍ତାବ ମଧ୍ୟ ଦେଇଥିବା ଚର୍ଚ୍ଚା ହେଉଛି । କାହା ନିର୍ଦ୍ଦେଶରେ ସସ୍ମିତ ଗଣମାଧ୍ୟମରେ ଏପରି ବୟାନ ଦେଲେ ଓ କାହିଁକି ଭୋଟ ଦେବା କଥା ସୋସିଆଲ ମିଡ଼ିଆରେ ପୋଷ୍ଟ କଲେ ସେସମ୍ପର୍କରେ ବିଜେଡି ସୁପ୍ରିମୋଙ୍କ ଆଗରେ ପ୍ରଶ୍ନ ଉଠାଇଥିବା ସୂଚନା ମିଳିଛି । ଏପରି ଘଟଣା ଦଳକୁ ନିନ୍ଦିତ କରିବା ସହ ଦଳ ଭାବମୂର୍ତ୍ତିକୁ ନଷ୍ଟ କରିଥିବା ସୁପ୍ରିମୋଙ୍କୁ ବରିଷ୍ଠ ନେତା ଜଣାଇଥିବା କୁହାଯାଉଛି । ଏଥିସହ ଦଳର ଆଭିମୁଖ୍ୟ ସ୍ପଷ୍ଟ କରିବାକୁ ନବୀନଙ୍କ ସାମ୍ନାରେ ବରିଷ୍ଠ ନେତା ଦାବି ରଖିଥିବା ଚର୍ଚ୍ଚା ହେଉଛି ।*
*ରାଜ୍ୟସଭାରେ ୱାକଫ୍ ବିଲକୁ ନେଇ ଭୋଟ ପ୍ରସଙ୍ଗରେ ସସ୍ମିତ ପାତ୍ରଙ୍କ ଏକ୍ସ ପୋଷ୍ଟକୁ ନେଇ ବିବାଦ ତେଜିଛି । ଏନେଇ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ଚିଠି ଲେଖିଛନ୍ତି ବରିଷ୍ଠ ବିଜେଡି ନେତା ପ୍ରଫୁଲ୍ଲ ସାମଲ । ଚିଠି ଲେଖି ସସ୍ମିତ ପାତ୍ରଙ୍କ ସୋସିଆଲ ମିଡିଆ ପୋଷ୍ଟକୁ ଦୁର୍ଭାଗ୍ୟଜନକ କହିବା ସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ନବୀନ ପଟ୍ଟନାୟକଙ୍କୁ ଲେଖିଥିବା ଚିଠିରେ ପ୍ରଫୁଲ୍ଲ ସାମଲ ଉଲ୍ଲେଖ କରିଛନ୍ତି ଯେ, ରାଜ୍ୟସଭା ସାଂସଦ ସସ୍ମିତ ପାତ୍ରଙ୍କ ଏକ୍ସ ପୋଷ୍ଟ ସଂଖ୍ୟାଲଘୁଙ୍କ ବିଶ୍ୱାସଭାଜନ ହେବା ପରିବର୍ତ୍ତେ ଦଳକୁ କ୍ଷତି ପହଞ୍ଚିାଇବ । ଏ ସଂପର୍କରେ ପୁନଃର୍ବିଚାର କରି ବିହିତ ପଦକ୍ଷେପ ନେବାକୁ ବିଜେଡି ସୁପ୍ରିମୋଙ୍କୁ ନିବେଦନ କରିଛନ୍ତି ପ୍ରଫୁଲ୍ଲ ସାମଲ । ଏପଟେ ସସ୍ମିତ ଯାହା କରିଛନ୍ତି ଭୁଲ କରିଛନ୍ତି ବୋଲି କନକ ନ୍ୟୁଜର ବିତର୍କ କାର୍ଯ୍ୟକ୍ରମରେ ସାମିଲ ହୋଇ କହିଛନ୍ତି ବରିଷ୍ଠ ବିଜେଡି ନେତା ଗଣେଶ୍ୱର ବେହେରା।*
