ପୋଖରୀରେ ବୁଡ଼ି ନାବାଳକ ମୃତ
ପୋଖରୀରେ ବୁଡ଼ି ନାବାଳକ ମୃତ
ହାଟଡିହି,୪/୯: ହାଟଡ଼ିହି ବ୍ଳକ ନନ୍ଦିପଦା ଥାନା ଅଧୀନ ଅସିଆ ଗ୍ରାମରେ ପୋଖରୀରେ ବୁଡ଼ି ୭ବର୍ଷୀୟ ନାବାଳକର ମୃତ୍ୟୁ ଘଟିଛି। ମୃତ ଶିଶୁ ଗ୍ରାମର ସ୍ବର୍ଗତ ତାଣ୍ଡି ହୋଙ୍କ ୭ବର୍ଷୀୟ ପୁଅ ସୁରେନ୍ଦ୍ର ହୋ। ସେ ଅସିଆ ମୁଣ୍ଡାସାହି ପ୍ରାଥମିକ ବିଦ୍ୟାଳୟରେ ପଢ଼ୁଥିଲେ। ଗତ ଶନିବାର ସ୍କୁଲ୍ ଛୁଟି ପରେ ଘରକୁ ଯାଇ ଖାଇ ସାରିବା ପରେ ଗାଧୋଇବାକୁ କହି ଘରୁ ଚାଲି ଆସିଥିଲା। କିନ୍ତୁ ଦୀର୍ଘ ସମୟ ପର୍ଯ୍ୟନ୍ତ ଆଉ ଘରକୁ ନ ଫେରିବା ଯୋଗୁଁ ମା’ ଶ୍ରୀମତୀ ହୋ ପଡୋଶୀ ମାନଙ୍କୁ ଧରି ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ମଧ୍ୟ କିଛି ସନ୍ଧାନ ପାଇ ନଥିଲେ। ଆଜି ସକାଳୁ ଗାଁ ନିକଟସ୍ଥ ପୋଖରୀରେ ଏହି ନାବାଳକ ଛାତ୍ରର ଶବ ଭାସୁଥିବା ଦେଖିବାକୁ ମିଳିଥିଲା। ଖବର ପାଇ ସରପଞ୍ଚଙ୍କ ପ୍ରତିନିଧ୍ଵ ସୁଧାଂଶୁ ବିଶ୍ବାଳ, ସମ୍ପୃକ୍ତ ବିଦ୍ୟାଳୟର ପ୍ରଧାନ ଶିକ୍ଷକ ନିରାକାର ଜେନା, ଶିକ୍ଷକ ହେମନ୍ତ ସାମଲ, ଉଦୟନାଥ ସା, କାଳିଆ ସ୍ବାଇଁ ପ୍ରମୁଖ ପହଞ୍ଚି ନନ୍ଦିପଦା ପୁଲିସ ଓ ଅଗ୍ନିଶମ ବାହିନୀଙ୍କୁ ସୂଚନା ଦେଇଥିଲେ। ନନ୍ଦିପଦା ପୁଲିସ ଘଟଣାସ୍ଥଳରେ ପହଞ୍ଚି ହାଟଡ଼ିହି ଦମକଳ କେନ୍ଦ୍ରର କର୍ମଚାରୀଙ୍କ ସହଯୋଗରେ ଶବକୁ ଉଦ୍ଧାର କରି ପୋଷ୍ଟମଟମ ପାଇଁ ଆନନ୍ଦପୁର ଡାକ୍ତରଖାନାକୁ ପଠାଇ ତଦନ୍ତ ଚଳାଇଛି। କିଛି ମାସ ତଳେ ମୃତ ଛାତ୍ର ସୁରେନ୍ଦ୍ରର ବାପା ତାଣ୍ଡି ହୋ ମଧ୍ୟ ପାଣିରେ ବୁଡି ମୃତ୍ୟୁବରଣ କରିଥିଲେ । ନାବାଳକର ମୃତ୍ୟୁକୁ ନେଇ ଅସିଆ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି।
ସୋମେଶ ପରିଡ଼ା ଙ୍କ ରିପୋର୍ଟ୍ ହାଟଡିହି ରୁ
