ବୁଦ୍ଧଖୋଲ ଘାଟି ତଳକୁ ଖସିଲା ବୋଲେରୋ , ଜଣେ ମହିଳା ଗୁରୁତର
ବୁଦ୍ଧଖୋଲ ଘାଟି ତଳକୁ ଖସିଲା ବୋଲେରୋ , ଜଣେ ମହିଳା ଗୁରୁତର
ବୁଗୁଡ଼ା : ତା ୨୪/୦୭/୨୩ : ସ୍ଥାନୀୟ ଏୈତିହାସିକ ଶୈବପୀଠ ବୁଦ୍ଧଖୋଲ ଘାଟିରେ ଆଜି ଅପରାହ୍ନରେ ଏକ ବୋଲେରୋ ଗାଡ଼ି ତଳକୁ ଖସିପଡିବାରେ ଜଣେ ମହିଳା ଗୁରୁତର ହୋଇଥିବା ବେଳେ ଅନ୍ୟମାନେ ସାମାନ୍ୟ ଆହତ ହୋଇଥିବା ଜଣାଯାଇଛି । ଗୁରୁତର ମହିଳା ଜଣକ ଗଜପତି ଜିଲ୍ଲା ଚନ୍ଦ୍ରଗିରି ଅଞ୍ଚଳର କେ.ବାଙ୍କି ରାଓ(୩୦)ଏବଂ ତାଙ୍କ ଛାତିରେ ପ୍ରବଳ ଯନ୍ତ୍ରଣା ହେଉଛି ବୋଲି ସେ କହୁଥିବାରୁ ବୁଗୁଡ଼ା ମେଡିକାଲରେ ପ୍ରାଥମିକ ଚିକିତ୍ସା ପରେ ୧୦୮ ଆମ୍ବୁଲାନ୍ସ ଯୋଗେ ବ୍ରହ୍ମପୁରକୁ ସ୍ଥାନାନ୍ତର କରାଯାଇଥିଲା । ପ୍ରକାଶ ଯେ , ବ୍ରହ୍ମପୁର ଅଞ୍ଚଳର ଏକ ଛୋଟ ପୁଅ ପିଲା ସହ ୭ ଜଣ ପୁରୁଷ ଓ ମହିଳା ଏକ ବୋଲେରୋ ଗାଡ଼ିରେ ବୁଦ୍ଧଖୋଲକୁ ବୁଲିଆସି ଫେରୁଥିବା ବେଳେ ଘାଟିରେ ଅସାବଧାନତା ବଶତଃ ଗାଡିଟି ଘାଟି ତଳକୁ ଖସି ପଡିଥିଲା ଏବଂ ସୌଭାଗ୍ୟରୁ ଏକ ଗଛରେ ଢେରା ଦେଇ ରହିଯାଇଥିଲା । ସେମାନଙ୍କୁ ସେଠାରୁ ଉଦ୍ଧାର କରାଯାଇ ବୁଗୁଡ଼ା ମେଡିକାଲକୁ ଅଣାଯାଇଥିଲା । ସେମାନେ ସମସ୍ତେ ନିଜର ନାମ ଗୋପନ ରଖିବାକୁ ଚାହୁଁଥିବାରୁ ସେମାନଙ୍କ ପରିଚୟ ପାଇବା ପାଇଁ ଡାକ୍ତର ଏବଂ ପୋଲିସକୁ ଅଢେଇ ଘଣ୍ଟା କାଳ ନାକେଦମ୍ ହେବାକୁ ପଡିଥିଲେ ହେଁ ସେମାନଙ୍କର ସଠିକ୍ ନାମ ଜଣା ପଡିନଥିଲା । ତେବେ ସେମାନେ ଚତୁରତାର ସହ ଗୁରୁତର ବାହାନା କରି ୨ଟି ଆମ୍ବୁଲାନ୍ସ ମଗାଇ ସମସ୍ତେ ବ୍ରହ୍ମପୁର ମେଡିକାଲକୁ ପଳାଇ ଥିଲେ । ସେମାନେ କାହିଁକି ସେମାନଙ୍କ ପରିଚୟ ଦେବାକୁ ପଛଘୁଞ୍ଚା ଦେଉଥିଲେ ସେନେଇ କୌଣସି ସ୍ବଷ୍ଟ ସୂଚନା ନଥିବା ବେଳେ ଗାଡିଟି ସେମିତି ବୁଦ୍ଧଖୋଲ ପାହାଡ଼ରେ ରହିଛି । ଏଭଳି ଘଟଣା ବୁଦ୍ଧଖୋଲ ଘାଟିରେ ପ୍ରଥମ ଥର ଘଟିଛି ବୋଲି ସାଧାରଣରେ ମତ ପ୍ରକାଶ ପାଇଛି ।
