ପ୍ରଧାନମନ୍ତ୍ରୀଙ୍କ ବାସଭବନରେ ସରିଲା ଉଚ୍ଚସ୍ତରୀୟ ବୈଠକ: ସେନାକୁ ମିଳିଲା ପୂର୍ଣ୍ଣ କ୍ଷମତା, ସମୟ ଓ ଟାର୍ଗେଟ ସ୍ଥିର କରିବାକୁ ମିଳିଲା ଅନୁମତି*
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବାସଭବନରେ ତାଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକ ହୋଇଛି। ଯେଉଁଥିରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଓ ଚିଫ୍ ଅଫ୍ ଡିଫେନ୍ସ ଷ୍ଟାଫ୍(ସିଡିଏସ୍) ଜେନେରାଲ ଅନିଲ ଚୌହାନଙ୍କ ସହ ତିନି ସେନା ମୁଖ୍ୟ ମଧ୍ୟ ଉପସ୍ଥିତ ଥିଲେ। ଏହି ବୈଠକ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଥିବା ସୁରକ୍ଷା ମାମଲାର କ୍ୟାବିନେଟ୍ କମିଟିର ବୈଠକର ଦିନକ ପୂର୍ବରୁ ହୋଇଛି। ଯାହାକି ରାଷ୍ଟ୍ରୀୟ ସୁରକ୍ଷା ମାମଲା ଉପରେ ନିଷ୍ପତ୍ତି ନେଉଥିବା ସରକାରଙ୍କ ସର୍ବୋଚ୍ଚ ସଂସ୍ଥା। ପ୍ରାୟ ୧ ଘଣ୍ଟା ଧରି ବୈଠକ ଚାଲିବା ପରେ ଏବେ ଶେଷ ହୋଇଛି।
କୁହାଯାଉଛି ଯେ, ଏହା ଏକ ବଡ଼ ଆକ୍ସନର ପ୍ରସ୍ତୁତି। ଏହି ବୈଠକ ଗତ ସପ୍ତାହ ପହଲଗାମ୍ରେ ହୋଇଥିବା ଆତଙ୍କୀ ହମଲା ପରେ ସ୍ଥିତି ଓ ଜମ୍ମୁ-କଶ୍ମୀରରେ ସୁରକ୍ଷା ସ୍ଥିତିର ସମୀକ୍ଷା କରାଯାଇଛି।। ସୂଚନା ଅନୁଯାୟୀ, ପ୍ରଧାନମନ୍ତ୍ରୀଙ୍କ ବାସଭବନରେ ଅନୁଷ୍ଠିତ ଏହି ବୈଠକରେ ଆକ୍ରମଣର ପରିସ୍ଥିତି, ସୁରକ୍ଷା ବାହିନୀର କାର୍ଯ୍ୟାନୁଷ୍ଠାନ ଏବଂ ଭବିଷ୍ୟତ ରଣନୀତି ଉପରେ ବିସ୍ତୃତ ଆଲୋଚନା କରାଯାଇଥିଲା।
ବୈଠକରେ ପ୍ରଧାନମନ୍ତ୍ରୀ ପହଲଗାମ ଆକ୍ରମଣର ଦୋଷୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି। ସେ ଅମରନାଥ ଯାତ୍ରା ଏବଂ ଅନ୍ୟାନ୍ୟ ନାଗରିକ କାର୍ଯ୍ୟକଳାପର ସୁରକ୍ଷାରେ କୌଣସି ତ୍ରୁଟି ନହେବା ନିଶ୍ଚିତ କରିବାକୁ ମଧ୍ୟ କହିଛନ୍ତି। ବିଶେଷଜ୍ଞଙ୍କ ମତରେ ଏହି ବୈଠକରେ ଆତଙ୍କୀ ହମଲା ପରେ ସୁରକ୍ଷାବଳଙ୍କ କାର୍ଯ୍ୟାନୁଷ୍ଠାନ ଓ ଆଗାମୀ ରଣନୀତି ଉପରେ ବିସ୍ତାର ଭାବରେ ଚର୍ଚ୍ଚା ହୋଇଛି। ସୂତ୍ର ଅନୁସାରେ, ପ୍ରଧାନମନ୍ତ୍ରୀ ମୋଦି ସେନାକୁ ସମ୍ପୂର୍ଣ୍ଣ କ୍ଷମତା ଦେଇଛନ୍ତି। ଏହା ସହ କହିଛନ୍ତି ଆତଙ୍କବାଦୀଙ୍କୁ ଉଚିତ ଜବାବ୍ ଦିଆଯାଉ। ଆକ୍ରମଣର ଟାର୍ଗେଟ ଏବଂ ସମୟ ଉଭୟ ସେନା ସ୍ଥିର କରୁ।
