ଗଜପତି:- ମହିଳା ଡାକ୍ତର ଛାତ୍ରୀଙ୍କୁ ସମୂହ ବଳାତ୍କାର ଓ ହତ୍ୟା ପ୍ରତିବାଦରେ ମୁଖ୍ୟ ଚିକିତ୍ସାଳୟର ମହିଳା ଡାକ୍ତର ଓ କର୍ମଚାରୀଙ୍କ କେଣ୍ଡେଲ ଶୋଭାଯାତ୍ରା ଓ ଶ୍ରଦ୍ଧାଞ୍ଜଳୀ ଜ୍ଞାପନ ..
କୋଲକାତା ସ୍ଥିତ ମେଡିକାଲ କଲେଜରେ ମହିଳା ଡାକ୍ତର ଛାତ୍ରୀଙ୍କୁ ସମୂହ ବଳାତ୍କାର ଓ ଅମାନୁଷିକ ବର୍ବରତା ସହ ହତ୍ଯା ପ୍ରତିବାଦରେ ପାରଳାଖେମୁଣ୍ଡି ସ୍ଥିତ ଗଜପତି ଜିଲ୍ଲା ମୁଖ୍ୟ ଚିକିସ୍ୟାଳୟର ମହିଳା ଡାକ୍ତର , ସ୍ବାସ୍ଥ୍ୟକର୍ମୀ ଓ ଅନ୍ୟାନ୍ୟ କାର୍ଯ୍ୟରତ ମହିଳା କର୍ମଚାରୀ ମାନଙ୍କ ପକ୍ଷରୁ ଏକ ପ୍ରତିବାଦ ତଥା ବିକ୍ଷୋଭ ଶୋଭାଯାତ୍ରା ଅନୁଷ୍ଠିତ ହୋଇଯାଇଛି ।
ଏଥିରେ ସ୍ତ୍ରୀ ଓ ପ୍ରସୂତି ବିଭାଗ ବିଶେଷଜ୍ଞ ଡାକ୍ତର ସନ୍ଧ୍ୟା ରାଣୀ ପାଣିଗ୍ରାହୀ , ଡାକ୍ତର ଇତିଶ୍ରୀ ମିଶ୍ର , ଡାକ୍ତର ଜେ: ଅରୁଣା , ଡାକ୍ତର ଭାରତୀ , ଡାକ୍ତର ମିନାକ୍ଷୀ , ଡାକ୍ତର ଜୀନାଙ୍କ ସମେତ ନର୍ସିଂ ଷ୍ଟାଫ ମହିଳା ସ୍ଵାସ୍ଥ୍ୟ କର୍ମୀ , ଆଶା କର୍ମୀ ଓ ସୁରକ୍ଷା କର୍ମୀ ବହୁ ସଂଖ୍ୟାରେ ଯୋଗ ଦେଇ କଳା-ବ୍ୟାଜ୍ ପରିଧାନ କରି ବିଭିନ୍ନ ପ୍ରକାରର ନାରା ଦେଇ ନିଜର ଅସନ୍ତୋଷ କ୍ଷୋଭ ପ୍ରକାଶ କରିଥିଲେ ।
ସେମାନେ ସମସ୍ତେ ଜଳନ୍ତା ମହମବତୀ ହାତରେ ଧରି ଆମେ ଚାହୁଁ ମୋମିତାକୁ ନ୍ୟାୟ ମିଳୁ ଏବଂ ଦୋଷୀକୁ ଦଣ୍ଡ ଦିଆଯାଉ ବୋଲି ବିଭିନ୍ନ ସ୍ଲୋଗାନ ମାନ ଦେଇ ମୁଖ୍ୟ ହସପିଟାଲ ପରିସରରେ ପରିକ୍ରମା କରିଥିଲେ ।
ମହିଳା ଡାକ୍ତର ମାନଙ୍କ ପକ୍ଷରୁ ନ୍ୟାଯ୍ୟ ଦାବୀ ରଖାଯାଇ ଏହି ଅବସରରେ କୁହା ଯାଇଛି ଯେ , ପ୍ରକୃତ ଦୋଷୀକୁ ଧରିବା ସହ ତାକୁ ଉଚିତ୍ ଦଣ୍ଡ ବିଧାନ କରିବା ଆମର ଦାବୀ ଏବଂ କେନ୍ଦ୍ର ସରକାର କାର୍ଯ୍ୟରତ ମହିଳା ମାନଙ୍କ କ୍ଷେତ୍ରରେ ଆଇନ ସୁରକ୍ଷା ଓ କାର୍ଯ୍ଯରତ ମହିଳା ମାନଙ୍କୁ ସୁରକ୍ଷା କଡାକଡି ବ୍ୟବସ୍ଥା ଊପରେ ମଧ୍ୟ ଆଲୋକପାତ କରିଥିଲେ ।
ଅନ୍ୟପକ୍ଷରେ ଡାକ୍ତର ମାନଙ୍କ ଉପରେ ହେଉଥିବା ହିଂସା ଓ ଆକ୍ରମଣର ମଧ୍ୟ ବୃଦ୍ଧି ପରିଲକ୍ଷିତ ହୋଇଥିବା ସହ ସମସ୍ତ ସମସ୍ୟାର ସମାଧାନ ପାଇଁ ସରକାରୀ ସ୍ତରରେ ଉଚିତ୍ ପଦକ୍ଷେପ ଗ୍ରହଣ କରିବା ସ୍ୱରୂପ ଡାକ୍ତରୀ ଛାତ୍ରୀଙ୍କୁ ନ୍ୟାୟ ଦେବା , ନାରୀକୁ ସବୁ କ୍ଷେତ୍ରରେ ସମ୍ମାନ ଦେବା , ସୁରକ୍ଷା ନାହିଁ ତ କାମ ନାହିଁ ଏବଂ ଡ୍ୟୁଟି ସମୟରେ କେନ୍ଦ୍ରୀୟ ସୁରକ୍ଷା ଯୋଗାଇ ଦେବା ପ୍ରଭୃତି ପ୍ରତି ଦୃଢ଼ ଦାବୀ କରା ଯାଇଥିଲା ।
ଶେଷରେ ଉପସ୍ଥିତ ସମସ୍ତେ ମୃତ ଡାକ୍ତରୀ ଛାତ୍ରୀଙ୍କ ଫଟୋ ଚିତ୍ର ସମ୍ମୁଖରେ ଜଳନ୍ତା କେଣ୍ଡେଲ ରଖି ଅମର ଆତ୍ମାର ସଦଗତି କାମନା କରି ଶ୍ରଦ୍ଧାଞ୍ଜଳୀ ଜ୍ଞାପନ କରିଥିଲେ।
———————————————
ଗଣେଶ କୁମାର ରାଜୁ
ପାରଳାଖେମୁଣ୍ଡି (ଗଜପତି)
———————————————–
