ଅଗ୍ନିଶମ ସପ୍ତାହ ପାଳନ ଉପଲକ୍ଷେ ଜନ ସଚେତନତା

ବୁଗୁଡ଼ା : ତା ୧୭/୦୪/୨୩ : ପ୍ରତି ବର୍ଷ ଆଗ୍ନିକ ଶହୀଦ ଦିବସ ଏପ୍ରିଲ୍ ୧୪ ତାରିଖରୁ ୨୦ ତାରିଖ ପର୍ଯ୍ୟନ୍ତ ଅଗ୍ନିଶମ ସପ୍ତାହ ପାଳନ କରାଯାଏ । ଏ ପରିପ୍ରେକ୍ଷୀରେ ସ୍ଥାନୀୟ ଅଗ୍ନିଶମ ବିଭାଗ ପକ୍ଷରୁ ଅଗ୍ନିଶମ ସପ୍ତାହ ପାଳନ ଅବସରରେ ଆଜି ବୁଗୁଡ଼ା ସହରରେ ଏକ ଜନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଅଗ୍ନିଶମ କେନ୍ଦ୍ରାଧିକାରୀ ସଞ୍ଜୟ କୁମାର ରାଉତଙ୍କ ନେତୃତ୍ବରେ ଅନ୍ୟ ଆଗ୍ନିକମାନେ ଶୋଭାଯାତ୍ରାରେ ବାହାରି ପ୍ରଚାରପତ୍ରିକା ବଣ୍ଟନ ପୂର୍ବକ ସ୍ଥାନୀୟ ଜନସାଧାରଣଙ୍କୁ ଅଗ୍ନି ସତର୍କତା ପାଳନ ଓ ଅଗ୍ନି ଦାଉରୁ ମୁକ୍ତି ସମ୍ପର୍କେ ସଚେତନ କରିଥିଲେ । ଏଥି ସହ ଯେକୌଣସି ଅଗ୍ନି ଦୁର୍ଘଟଣା ନଜରକୁ ଆସିଲେ ତୁରନ୍ତ ବୁଗୁଡ଼ା ଅଗ୍ନିଶମ କେନ୍ଦ୍ରର ଫୋନ ନମ୍ବର ୮୭୬୩୮୦୮୩୫୩କୁ କିମ୍ବା ୧୧୨କୁ ଖବର ଦେବାକୁ ନିବେଦନ କରିଥିଲେ । ପ୍ରକାଶ ଯୋଗ୍ୟ ଯେ , ଅଞ୍ଚଳରେ ଘଟୁଥିବା ସଡକ ଦୁର୍ଘଟଣା , ଅଗ୍ନିକାଣ୍ଡ ଘଟଣା ଓ ଅନ୍ୟାନ୍ୟ ଅଘଟଣ ବେଳେ ସ୍ଥାନୀୟ ଅଗ୍ନିଶମ କର୍ମଚାରୀମାନେ କ୍ରିୟାଶୀଳତା ସହ ନିଷ୍ଠାପର ସହାୟତା ଯୋଗାଇ ଆସୁଥିବାରୁ ଅଞ୍ଚଳବାସୀଙ୍କ ପ୍ରଶଂସାଭାଜନ ହୋଇପାରିଥିବା ଜଣାଯାଇଛି ।