ଭାରସାମ୍ଯ ହରାଇ ଓଲଟିଲା ଅଟୋ , ୧୧ ଆହତଙ୍କ ମଧ୍ଯରୁ ୫ ଗୁରୁତର…

ବୁଗୁଡା : ତା ୧୭/୦୩/୨୪ : ବୁଗୁଡା ଥାନା ଅନ୍ତର୍ଗତ ପଙ୍କଳସାହି ଗାଁ ଛକ ନିକଟ ବୁଲାଣି ରାସ୍ତାରେ ଏକ ଯାତ୍ରୀବାହି ଅଟୋ ଓଲଟି ୧୧ ଜଣ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ ୫ ଜଣ ଗୁରୁତରଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଥିବା ଜଣାଯାଇଛି । ଗୁରୁତର ଯାତ୍ରୀମାନେ ହେଲେ ବ୍ରହ୍ମପୁର ସିଦ୍ଧାର୍ଥ ନଗର ବାସିନ୍ଦା ନୁତୁନି ନାଇକ (୨୮) , ଦମୟନ୍ତୀ ଦାସ(୫୫) , ରାଜଲକ୍ଷ୍ମୀ ଦାସ(୫) , ସୁମତି ଦାସ ଓ ଦିପକ ଦାସ ଏବଂ ଆହତ ଅଟୋ ଚାଳକ ଜଣକ ହେଲେ ବ୍ରହ୍ମପୁର ଗୋଇଲୁଣ୍ଡିର ଆପାରାଓ ଦୋରା । ଘଟଣାରୁ ପ୍ରକାଶ ଯେ , ବୁଗୁଡ଼ା ବ୍ଲକ ମାଣିତରା ପଞ୍ଚାୟତର କଣ୍ଡରାଇ ଗାଁର ଏକ ଭୋଜିକାର୍ଯ୍ଯରେ ଯୋଗ ଦେଇ ଅଟୋରେ ଫେରୁଥିବା ବେଳେ ପଙ୍କଳସାହି ଗାଁ ନିକଟ ବୁଲାଣି ରାସ୍ତାରେ ଭାରସାମ୍ଯ ତାହା ଓଲଟି ପଡିଥିଲା । ଫଳରେ ସେଥିରେ ବସିଥିବା ୧୪ ଜଣଙ୍କ ମଧ୍ୟରୁ ୧୧ ଜଣ ଆହତ ହୋଇଥିଲେ । ସେହି ରାସ୍ତା ଦେଇ ଆସୁଥିବା ଲକ୍ଷ୍ମୀ ବସରେ ସେମାନଙ୍କୁ ସେଠାରୁ ଉଦ୍ଧାର କରାଯାଇ ବୁଗୁଡା ମେଡିକାଲକୁ ଅଣାଯାଇଥିଲା । ଦୁର୍ଘଟଣାରେ ନୁତୁନିଙ୍କ ବାମ ହାତ ଓ ଦମୟନ୍ତୀଙ୍କ ଡାହାଣ ହାତ ଭାଙ୍ଗିବା ସହ ମୁଣ୍ଡ ଫାଟି ଯାଇଥିବା ବେଳେ ଡ୍ରାଇଭରଙ୍କ କାନମୁଣ୍ଡାକୁ ରାଜଲକ୍ଷ୍ମୀ ଓ ସୁମତିଙ୍କ ମୁଣ୍ଡକୁ ଏବଂ ଦିପକଙ୍କ ଅଣ୍ଟାରେ ଆଘାତ ଲାଗିଥିଲା । ପ୍ରାଥମିକ ଚିକିତ୍ସା ପରେ ଗୁରୁତରଙ୍କୁ ୧୦୮ ଆମ୍ବୁଲାନ୍ସ ଯୋଗେ ବ୍ରହ୍ମପୁରକୁ ସ୍ଥାନାନ୍ତର କରାଯାଇଥିଲା । ଦୁର୍ଘଟଣାଗ୍ରସ୍ତ ଅଟୋ(ନଂ ଓଡି-୦୭ ଏଏଫ୍ ୧୬୪୬)କୁ ପୋଲିସ ଜବତ କରିବା ସହ ଆହତ ଡ୍ରାଇଭରକୁ ଅଟକ ରଖି ଘଟଣାର ତଦନ୍ତ କରୁଥିବା ଜଣାଯାଇଛି ।