ମାୟାଧର ମାନସିଂହ ଥିଲେ ଏକ ସାଲିସବିହୀନ ବ୍ୟକ୍ତିତ୍ୱ     

ସମ୍ବଲପୁର,(ରାଜାରାମ ଷଡ଼ଙ୍ଗୀ):ଓଡିଶା ସାଂସ୍କୃତିକ ସମାଜ ପକ୍ଷରୁ ପଦ୍ମଶ୍ରୀ ଡ଼ ମାୟାଧର ମାନସିଂହଙ୍କ ୧୧୯ ତମ ଜୟନ୍ତୀ ନେତାଜୀ ସୁଭାଷ ଚନ୍ଦ୍ର ବୋଷ ମହାବିଦ୍ୟାଳୟ ଠାରେ ପାଳନ କରାଯାଇଥିଲା l ମାନସିଂହଙ୍କ ପ୍ରତିକୃତିରେ ପୁଷ୍ପମାଲ୍ୟ ଅର୍ପଣ ପରେ କଲେଜ ଓଡ଼ିଆ ବିଭାଗର ମୁଖ୍ୟ ଡ଼. ଶ୍ୟାମ ଭୋଇ ଅତିଥିମାନଙ୍କ ପରିଚୟ ପ୍ରଦାନ କରି ମାନସିଂହଙ୍କ ଅବଦାନ ସମ୍ପର୍କରେ ସ୍ମୃତିଚାରଣ କରିଥିଲେ l ଓଡିଶା ସାଂସ୍କୃତିକ ସମାଜର ସଭାପତି ଡ଼ ପରେଶ ଚନ୍ଦ୍ର ଦାନୀ ଏହି ସଭାରେ ସଭାପତିତ୍ୱ କରି କହିଲେ ମାୟାଧର ମାନସିଂହ ହେଉଛନ୍ତି ଏକାଧାରରେ ଜଣେ ଜାତୀୟବାଦୀ, ଆଦର୍ଶବାଦୀ, ସଂସ୍କାରବାଦୀ, ମାନବବାଦୀ ର ସମାହାର l ସମ୍ବଲପୁରରେ ମାନସିଂହଙ୍କ ଜୟନ୍ତୀ ପାଳନର ଅୟମାରମ୍ଭ ଓ ଗଙ୍ଗାଧର ମେହେର ମହାବିଦ୍ୟାଳୟ ପାଠାଗାରକୁ ତାଙ୍କ ନାମରେ ନାମିତ କରିବାରେ ଓଡିଶା ସାଂସ୍କୃତିକ ସମାଜର ଭୁମିକା ସମ୍ପର୍କରେ ଡ଼ ଦାନୀ ସୂଚନା ଦେଇଥିଲେ l ମୁଖ୍ୟବକ୍ତା ବିଶିଷ୍ଟ ଇଙ୍ଗରାଜୀ ସାହିତ୍ୟ ସାଧକ ଡ଼ କାମଦେବ ସାହୁ ମାନସିଂହଙ୍କ ସାମଗ୍ରିକ ସାହିତ୍ୟକୃତୀ ଉପରେ ପର୍ଯ୍ୟାଲୋଚନା କରି ତାଙ୍କ ସାହିତ୍ୟ ପ୍ରେମ ଓ ଆଦର୍ଶ ଉପରେ ଆଧାରିତ ବୋଲି କହିଥିଲେ l ମାନସିଂହଙ୍କ ଗଙ୍ଗାଧର ମେହେର କଲେଜର ଅଧ୍ୟକ୍ଷ ଥିବା ସମୟକୁ ସୁବର୍ଣ୍ଣ ଯୁଗ ବୋଲି କୁହାଯାଏ l ମାନସିଂହ ନିଜ ଆଦର୍ଶ ସହ ସାଳିସ କରୁ ନ ଥିବାରୁ ତାଙ୍କ ଚାକିରୀ କାଳରେ ବହୁ ନିର୍ଯ୍ୟାତନାର ସମ୍ମୁଖୀନ ହୋଇଥିଲେ ବୋଲି ଡ଼ ସାହୁ କହିଥିଲେ l ମୁଖ୍ୟ ଅତିଥି କଲେଜର ଭାରପ୍ରାପ୍ତ ଅଧ୍ୟକ୍ଷ ଦୁର୍ଲଭ କୁମାର ସା ଛାତ୍ରଛାତ୍ରୀମାନଙ୍କୁ ମାନସିଂହଙ୍କ ଚିନ୍ତାଧାରାରେ ଅନୁପ୍ରାଣିତ ହେବାକୁ କହିଥିଲେ l ଧନ୍ୟବାଦ ଅର୍ପଣ କରିଥିଲେ ଓଡିଶା ସାଂସ୍କୃତିକ ସମାଜର ଯୁଗ୍ମ ସମ୍ପାଦକ ଶ୍ରୀମତୀ ସୁରେଖା ସାହୁ l ଡ଼ ସନ୍ତୋଷ ଦାଶ, ଅଖିଳ ପଟ୍ଟନାୟକ, ରାଜେନ୍ଦ୍ର ପଣ୍ଡା, ରତ୍ନ ଭୁଷଣ ପୁରୁଷେଠ, ରାମାନୁଜ ପଣ୍ଡା, ଯୟାଦେଵୀ ବାବୁ, ଡ଼ ପ୍ରସନ୍ନ ମିଶ୍ର, ଯୋଗେଶ ହୋତା, ଡ଼ ଶ୍ରଦ୍ଧାମୟୀ ପୁରୋହିତ, ଡ଼ ରଶ୍ମିତା ରାଉତରାୟ ପ୍ରମୁଖ ମାନସିଂହଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।