କଲେଜ କିରାଣୀଙ୍କୁ ଅବସରକାଳୀନ ବିଦାୟ ସମ୍ବର୍ଦ୍ଧନା
ବୁଗୁଡା : ତା ୦୫/୧୨/୨୪ : ସ୍ଥାନୀୟ ପିପୁଲ୍ସ କଲେଜର ଅବସରପ୍ରାପ୍ତ କିରାଣୀ କିଶୋର ଚନ୍ଦ୍ର ନାୟକଙ୍କୁ ବିଦାୟ ସମ୍ବର୍ଦ୍ଧନା ପ୍ରଦାନ ଉପଲକ୍ଷେ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । କଲେଜର କର୍ମଚାରୀ ସଂଘ ପକ୍ଷରୁ ସମ୍ମିଳନୀ କକ୍ଷରେ ଆୟୋଜିତ ଉକ୍ତ କାର୍ଯ୍ୟକ୍ରମ ଅଧ୍ଯକ୍ଷ ହରିକୃଷ୍ଣ ନାୟକଙ୍କ ସଭାପତିତ୍ବରେ ଅନୁଷ୍ଠିତ ହୋଇଥିଲା ବେଳେ ଏଥିରେ କର୍ମଚାରୀ ସଂଘ ସମ୍ପାଦକ ଅଧ୍ଯାପକ ହିମାଂଶୁ ଶେଖର ରଥ ଓ ସହ-ସମ୍ପାଦକ ଅଧ୍ଯାପକ ଜୟରାମ ବିଷୋୟୀ ମଞ୍ଚାସୀନ ରହିଥିଲେ । କଲେଜର ସମସ୍ତ କର୍ମଚାରୀ ଅବସରପ୍ରାପ୍ତ କିରାଣୀଙ୍କ ଉତ୍ସର୍ଗୀକୃତ ସେବାର ସ୍ମୃତି ଚାରଣ ସହ ତାଙ୍କର ସୁଗୁଣ ସମ୍ପର୍କେ ଆଲୋକପାତ କରିଥିଲେ । ଏ ଅବସରରେ ତାଙ୍କୁ ପୁଷ୍ପଗୁଚ୍ଛ, ଉପଢୌକନ, ମାନପତ୍ର ଓ ଉପହାର ପ୍ରଦାନ ପୂର୍ବକ ବିଦାୟକାଳୀନ ସମ୍ବର୍ଦ୍ଧନା ଜ୍ଞାପନ ସହ ତାଙ୍କର ସୁଖମୟ ଦୀର୍ଘାୟୁ କାମନା କରାଯାଇଥିଲା ।
