କେନାଲରୁ ଆହତ କୃଷ୍ଣସାର ମୃଗ ଉଦ୍ଧାର 

ବୁଗୁଡା : ତା ୦୩/୦୮/୨୪ : ବୁଗୁଡା ଏନ୍ଏସି ଅନ୍ତର୍ଗତ କେନାଲ ସାହିରେ ରହିଥିବା କେନାଲ ମଧ୍ୟରୁ ଏକ ଆହତ କୃଷ୍ଣସାର ମୃଗକୁ ଲୋକେ ଆଜି ସକାଳେ ଉଦ୍ଧାର କରି ବନ ବିଭାଗକୁ ହସ୍ତାନ୍ତର କରିଥିବା ଜଣାଯାଇଛି । ପ୍ରକାଶ ଯେ , ଗତକାଲି ରାତି ଏଗାରଟା ବେଳକୁ କୃଷ୍ଣସାର ମୃଗଟି କେଉଁଆଡ଼ୁ ଖସି ମଦନ ମୋହନ ଛକ ଓ ଗଣେଶ ମାର୍କେଟ୍ ଦେଇ ଅରବିନ୍ଦ ନଗର ପଟକୁ ଦୌଡି ଯାଉଥିବାର ଲୋକେ ଦେଖିଥିଲେ । ସେହି ରାତିରେ କେନାଲ ସାହିର ଲୋକେ ଚିତ୍କାର ଶୁଣୁଥିଲେ ହେଁ କିଛି ଠଉରାଇ ପାରିନଥିଲେ । ତେବେ ଆଜି ସକାଳେ ଲୋକେ ଚିତ୍କାର ଶୁଣି ଆହତ ଅବସ୍ଥାରେ କେନାଲ ପାଣି ମଧ୍ୟରେ ଥିବା କୃଷ୍ଣସାର ମୃଗଟିକୁ ଦେଖିବାକୁ ପାଇଥିଲେ । ତାହାକୁ କେନାଲ ମଧ୍ୟରୁ ଉଦ୍ଧାର କରି ବନ ବିଭାଗକୁ ଖବର ଦେଇଥିଲେ । ବହୁ ବିଳମ୍ବରେ ବନ ବିଭାଗ କର୍ମଚାରୀମାନେ ସେଠାରେ ପହଞ୍ଚିବା ପରେ କୃଷ୍ଣସାର ମୃଗଟିକୁ ସେମାନଙ୍କୁ ହସ୍ତାନ୍ତର କରାଯାଇଥିଲା। ପ୍ରାଥମିକ ଚିକିତ୍ସା ପରେ କୃଷ୍ଣସାର ମୃଗଟି ସୁସ୍ଥ ହେବା ପରେ ତାକୁ ଜଙ୍ଗଲରେ ଛଡା ଯାଇଥିବା ଜଣାଯାଇଛି ।