ଗୁଣୁପୁର ଉପଖଣ୍ଡ ଚିକିତ୍ସାଳୟରେ ସ୍ୱାସ୍ଥ୍ୟସେବା ବିପର୍ଯ୍ୟସ୍ତ, (ଡାକ୍ତର ଲେଖୁଛନ୍ତି ମିଳୁନି ଔଷଧ )
ଗୁଣୁପୁର(ସୁରେନ୍ଦ୍ର ମହାନ୍ତି )ରାୟଗଡା ଜିଲ୍ଲା ଗୁଣୁପୁର ଉପଖଣ୍ଡ ଚିକିତ୍ସାଳୟରେ ସ୍ୱାସ୍ଥ୍ୟ ସେବା ଏବେ ବିପର୍ଯ୍ୟସ୍ତ ହୋଇ ପଡିଛି । ପ୍ରଥମତଃ ଏଠାରେ ଆବଶ୍ୟକ ଡାକ୍ତର, ବିଶେଷଜ୍ଞ ନଥିବା ବେଳେ ବର୍ତ୍ତମାନ ସାଧାରଣ ଥଣ୍ଡା, କାଶ, କିମ୍ବା ଆଣ୍ଟିବୟୋଟିକ ଔଷଧ,ସିରପ କିଛି ବି ରୋଗୀଙ୍କୁ ମିଳୁନାହିଁ । କେବଳ ପାରସିଟାମଲ ଓ ଓଆରଏସ ଦେଇ କାମ ଚଳେଇ ଦେଉଥିବାରୁ ଅସନ୍ତୋଷ ଦେଖାଦେଇଛି।ବର୍ତ୍ତମାନ ପାଗ ପରିବର୍ତ୍ତନ,ୠତୁ ପରିବର୍ତ୍ତନ ହେଉ ଥିବାରୁ ଜ୍ୱର, ଥଣ୍ଡା, କାଶ, ମ୍ୟାଲେରିଆ, ଡେଙ୍ଗୁ, ହଇଜା ସ୍ଥାନେ ସ୍ଥାନେ ଦେଖାଯାଉଛି । ରୋଗୀଙ୍କ ସଂଖ୍ୟା ବୃଦ୍ଧି ପାଉଛି । ସବୁଠାରୁ ଆଶ୍ଚର୍ଯ୍ୟ ର କଥା ହେଉଛି ଡାକ୍ତର ଯେଉଁ ଔଷଧ କିମ୍ବା ସିରପ ପ୍ରେସକ୍ରିପ୍ସନରେ ଲେଖୁଛନ୍ତି ସେଇଟା ମଧ୍ୟ ରୋଗୀଙ୍କୁ ଦିଆଯାଉନାହିଁ । ଖାଲି ପାରାସିଟାମଲ ଔଷଧ ଦେଉଥିବାରୁ ରୋଗୀ ଆଉ ଉପଖଣ୍ଡ ସରକାରୀ ଚିକିତ୍ସାଳୟକୁ ଭରସା କରି ପାରୁନାହାନ୍ତି । ତେବେ ବାସ୍ତବିକ ଡ଼ାକ୍ତରଖାନାକୁ ଥଣ୍ଡା, କାଶ, ଅନ୍ୟାନ୍ୟ ରୋଗ ପାଇଁ ମେଡ଼ିସିନ, ସିରପ ଆସୁନାହିଁ ନା ଥାଇବି ରୋଗୀଙ୍କୁ ଦିଆଯାଉ ନାହିଁ ଏହାର ତଦନ୍ତ କରିବା ନିହାତି ଆବଶ୍ୟକ ରହିଛି ବୋଲି ସାଧାରଣରେ ଆଲୋଚନା ହେଉଥିବା ଶୁଣିବାକୁ ମିଳୁଛି।
