ଏନ୍ଟିପିସି ତାଳଚେର ଥର୍ମାଲର ଷ୍ଟେଜ୍-୩ ସମ୍ପ୍ରସାରଣ ପ୍ରକଳ୍ପର ଅଗ୍ରଗତି ସମୀକ୍ଷା କଲେ ସିଇଏ ଅଧ୍ୟକ୍ଷ
ତାଳଚେର, ୫ ଅଗଷ୍ଟ: କେନ୍ଦ୍ରୀୟ ବିଦ୍ୟୁତ କର୍ତ୍ତୃପକ୍ଷ (CEA)ର ଅଧ୍ୟକ୍ଷ ଘନଶ୍ୟାମ ପ୍ରସାଦ ମଙ୍ଗଳବାର ଏନ୍ଟିପିସି ତାଳଚେର ଥର୍ମାଲ ପାୱାର ଷ୍ଟେସନ୍ ପରିଦର୍ଶନ କରି ଷ୍ଟେଜ୍-୩ ସମ୍ପ୍ରସାରଣ ପ୍ରକଳ୍ପ (୨×୬୬୦ ମେଗାୱାଟ୍)ର ଅଗ୍ରଗତିର ସମୀକ୍ଷା କରିଛନ୍ତି। ଦେଶର ବିଦ୍ୟୁତ ଉତ୍ପାଦନ କ୍ଷମତା ବୃଦ୍ଧି ଲକ୍ଷ୍ୟରେ ଏହି ପ୍ରକଳ୍ପକୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି।
ପରିଦର୍ଶନ ସମୟରେ ଶ୍ରୀ ପ୍ରସାଦ ୪୦୦ କେଭି ଜିଆଇଏସ୍ (GIS) କଣ୍ଟ୍ରୋଲ ରୁମ୍ର ଉଦ୍ଘାଟନ କରିଥିଲେ। ଏହି ଅବସରରେ ଏନ୍ଟିପିସିର ରିଜିଓନାଲ ଏକ୍ସିକ୍ୟୁଟିଭ୍ ଡାଇରେକ୍ଟର (ଇଆର-୨) ସୋମେଶ ବନ୍ଦ୍ୟୋପାଧ୍ୟାୟ, ତାଳଚେର ଥର୍ମାଲର କାର୍ଯ୍ୟନିର୍ବାହୀ ନିର୍ଦ୍ଦେଶକ ବିଜୟ ଚାନ୍ଦ, ପ୍ରକଳ୍ପ ମହାପ୍ରବନ୍ଧକ ପ୍ରବୀର କୁମାର, ତାଳଚେର ଉପଜିଲ୍ଲାପାଳ ଆଶିଷ କୁମାର ସାହୁ, ଏଜିଏମ୍ (ଏଚ୍ଆର୍) ରୋହିତ କୁମାର, ଏଜିଏମ୍ (ଇଏମ୍ଜି) ଅଞ୍ଜନ ସାହୁ ଏବଂ ବିଏଚ୍ଇଏଲ୍ର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଏହାପରେ ସେ ସୁଇଚ୍ୟାର୍ଡ, ଏନ୍ଡିସିଟି (NDCT), ବଏଲର୍, ଚିମ୍ନି ସମେତ ବିଭିନ୍ନ ନିର୍ମାଣାଧୀନ ସ୍ଥାନ ପରିଦର୍ଶନ କରି ପ୍ରକଳ୍ପର କାର୍ଯ୍ୟ ଅଗ୍ରଗତି ସମ୍ପର୍କରେ ଅବଗତ ହୋଇଥିଲେ।
ପରିଦର୍ଶନ ଶେଷରେ ଶ୍ରୀ ପ୍ରସାଦ ଏନ୍ଟିପିସିର ବରିଷ୍ଠ ଅଧିକାରୀମାନଙ୍କ ସହ ଏକ ସମୀକ୍ଷା ବୈଠକରେ ଅଧ୍ୟକ୍ଷତା କରିଥିଲେ। ବୈଠକରେ ଷ୍ଟେଜ୍-୩ ପ୍ରକଳ୍ପର ଦୁଇଟି ୟୁନିଟ୍ର ନିର୍ଦ୍ଧାରିତ ସମୟ ମଧ୍ୟରେ କାର୍ଯ୍ୟ ସମାପ୍ତ ଓ କମିଶନିଂ ଉପରେ ଗୁରୁତ୍ୱ ଦିଆଯାଇଥିଲା, ଯାହା ଓଡ଼ିଶା ସମେତ ଦେଶର ବର୍ଦ୍ଧିତ ବିଦ୍ୟୁତ ଚାହିଦା ପୂରଣରେ ସହାୟକ ହେବ।
ସିଇଏ ଅଧ୍ୟକ୍ଷ ପ୍ରକଳ୍ପର ଉଲ୍ଲେଖନୀୟ ଅଗ୍ରଗତିକୁ ପ୍ରଶଂସା କରିବା ସହ ନିର୍ମାଣ କାର୍ଯ୍ୟ ସମୟରେ ଉଚ୍ଚମାନର ସୁରକ୍ଷା ବ୍ୟବସ୍ଥା ବଜାୟ ରଖିଥିବାରୁ ପ୍ରକଳ୍ପ ଟିମ୍କୁ ସାଧୁବାଦ ଜଣାଇଥିଲେ। ସେ କହିଥିଲେ, ଏନ୍ଟିପିସି ତାଳଚେର ଥର୍ମାଲକୁ ଏକ ଆଧୁନିକ, ଦକ୍ଷ ଏବଂ ପରିବେଶ ଅନୁକୂଳ ବିଦ୍ୟୁତ ଉତ୍ପାଦନ କେନ୍ଦ୍ରରେ ପରିଣତ କରିବାରେ କର୍ମଚାରୀ ଓ ପ୍ରକଳ୍ପ ଦଳର ନିଷ୍ଠା ପ୍ରଶଂସନୀୟ। ଏହି ପ୍ରକଳ୍ପ ଦେଶର ଶକ୍ତି ସୁରକ୍ଷା ସୁଦୃଢ଼ କରିବା ସହ ଆର୍ଥିକ ବିକାଶରେ ମଧ୍ୟ ଗୁରୁତ୍ୱପୂର୍ଣ୍ଣ ଅବଦାନ ରଖିବ ବୋଲି ସେ ଆଶା ପ୍ରକାଶ କରିଥିଲେ।
ଏହି ପରିଦର୍ଶନ ମାଧ୍ୟମରେ ଏନ୍ଟିପିସି ତାଳଚେର ଥର୍ମାଲ ପକ୍ଷରୁ ଷ୍ଟେଜ୍-୩ ସମ୍ପ୍ରସାରଣ ପ୍ରକଳ୍ପକୁ ନିର୍ଦ୍ଧାରିତ ସମୟ ମଧ୍ୟରେ ସମ୍ପୂର୍ଣ୍ଣ କରି ଦେଶକୁ ନିରନ୍ତର, ନିର୍ଭରଯୋଗ୍ୟ ଏବଂ ସ୍ଥାୟୀ ବିଦ୍ୟୁତ ଯୋଗାଣ ଦେବା ପ୍ରତି ପ୍ରତିବଦ୍ଧତାକୁ ପୁନଃ ଦୋହରାଇଛି।
