ପିପୁଲ୍ସ କଲେଜରେ ୭୬ତମ ଏନସିସି ଦିବସ ପାଳିତ 

ବୁଗୁଡ଼ା : ତା ୨୪/୧୧/୨୪ : ସ୍ଥାନୀୟ ପିପୁଲ୍ସ କଲେଜର ଏନସିସି ଓ୍ବିଙ୍ଗ୍ ପକ୍ଷରୁ ୭୬ତମ ଏନସିସି ଦିବସ ପାଳିତ ହୋଇଯାଇଛି । କଲେଜର ଏନସିସି ଆର୍ମି ଓ୍ବିଙ୍ଗ୍ ଲେଫ୍ଟନାଣ୍ଟ ଅଜୟ କୁମାର ସାହୁଙ୍କ ତତ୍ତ୍ୱାବଧାନରେ ଆୟୋଜିତ ଉକ୍ତ କାର୍ଯ୍ୟକ୍ରମ ଅବସରରେ କଲେଜ ଅଧ୍ୟକ୍ଷ ହରିକୃଷ୍ଣ ନାୟକ ଏନସିସି ପତାକା ଉତ୍ତୋଳନ ସାଙ୍ଗକୁ କ୍ଯାଡେଟମାନଙ୍କ ପ୍ଯାରେଡ୍ ଅଭିବାଦନ ଗ୍ରହଣ କରିଥିଲା ବେଳେ ସ୍ଥାନୀୟ ଅବସରପ୍ରାପ୍ତ ସେନା ସଂଘର ସଭାପତି କାଳି ଚରଣ ପଟ୍ଟନାୟକଙ୍କ ସମେତ ସେବା ନିବୃତ୍ତ ସେନାଗଣ ମଧ୍ୟ ଉପସ୍ଥିତ ରହିଥିଲେ । ଏଥି ସହ କଲେଜ ସମ୍ମିଳନୀ କକ୍ଷରେ ଅଧ୍ଯକ୍ଷ ହରିକୃଷ୍ଣ ନାୟକଙ୍କ ସଭାପତିତ୍ବରେ ଅନୁଷ୍ଠିତ ସଭାକାର୍ଯ୍ଯରେ ଅତିଥି ଭାବେ ଅର୍ଥନୀତି ବିଭାଗ ଅଧ୍ଯାପକ ଶଙ୍କର ପରିଡା ଯୋଗ ଦେଇ କ୍ଯାଡେଟମାନଙ୍କୁ ଅଧ୍ଯୟନରେ ମନୋନିବେଶ ସହ ସେବାକାର୍ଯ୍ୟରେ ନିୟୋଜିତ ରହିବା ନିମନ୍ତେ ମାର୍ଗ ଦର୍ଶନ କରିବା ସାଙ୍ଗକୁ ଏନସିସି ଦିବସ ପାଳନର ତାତ୍ପର୍ଯ୍ୟ ସମ୍ପର୍କେ ଆଲୋକପାତ କରିଥିଲେ । ଏ ଅବସରରେ ନେସନାଲ୍ କ୍ଯାମ୍ପରେ ଯୋଗଦାନ କରିଥିବା କ୍ଯାଡେଟ୍ ସୁଧାକର ସ୍ବାଇଁ , ସୁମନ ପ୍ରଧାନ ଓ ଜିତେନ୍ଦ୍ର କୁମାର ଗୌଡ ପ୍ରମୁଖଙ୍କୁ ସମ୍ମାନିତ କରାଯାଇଥିଲା । ସେହିପରି ପିପୁଲ୍ସ ହାଇସ୍କୁଲରେ ଏନସିସି ଶିକ୍ଷକ ପ୍ରଶାନ୍ତ କୁମାର ଗୌଡଙ୍କ ପୌରହିତ୍ୟରେ ଅନୁଷ୍ଠିତ ଏନସିସି ଦିବସ ପାଳନ କାର୍ଯ୍ୟକ୍ରମରେ ଅତିଥି ଭାବେ ଆଇଆଇସି ସୀତାଂଶୁ ଶେଖର ମାନ୍ଧାତା ଯୋଗ ଦେଇ ଏନସିସି ପତାକା ଉତ୍ତୋଳନ ଏବଂ କ୍ଯାଡେଟମାନଙ୍କ ପ୍ଯାରେଡ୍ ଅଭିବାଦନ ଗ୍ରହଣ କରି ସେମାନଙ୍କୁ ମାର୍ଗ ଦର୍ଶନ କରିଥିଲେ।