୨ଟି ଦୁର୍ଘଟଣାରେ ୩ ଆହତ ମଧ୍ୟରୁ ୧ ଗୁରୁତର

୨ଟି ଦୁର୍ଘଟଣାରେ ୩ ଆହତ ମଧ୍ୟରୁ ୧ ଗୁରୁତର
ବୁଗୁଡ଼ା : ତା ୨୦/୦୬/୨୩ : ବୁଗୁଡ଼ା ଥାନା ଅନ୍ତର୍ଗତ ବୁଗୁଡ଼ା – ବାଲିପଦର ରାସ୍ତାର ଖରିଡା ଛକଠାରେ ୨ଟି ଦୁର୍ଘଟଣାରେ ୩ ଜଣ ଆହତଙ୍କ ମଧ୍ୟରୁ ଜଣେ ଗୁରୁତର ଅବସ୍ଥାରେ ବ୍ରହ୍ମପୁରକୁ ସ୍ଥାନାନ୍ତର ହୋଇଥିବା ଜଣାଯାଇଛି । ଗୁରୁତର ଜଣକ ହେଲେ ବାଲିପଦର ଗାଁ ଜଳିସାହିର ଖଦାଳ ରାଉତ (୨୫) ଏବଂ ଆହତ ଦୁଇ ଜଣ ହେଲେ କବିସୂର୍ଯ୍ୟ ନଗର ଥାନା ଅନ୍ତର୍ଗତ ସାନ ଚଢିଆପଡା ଗ୍ରାମର ସିମାଞ୍ଚଳ ନାୟକ ଓ ବାଲିପଦର ଗ୍ରାମର ବାଳି ରାଉତ । ଘଟଣାରୁ ପ୍ରକାଶ ଯେ , ଆଜି ରାତିରେ ଖଦାଳ ଏକ ବାଇକ୍ ଯୋଗେ କୌଣସି କାମରେ ବୁଗୁଡ଼ା ଆଡକୁ ଆସୁଥିବା ବେଳେ ଖରିଡା ଛକଠାରେ ବାଇକଟି ଦୁର୍ଘଟଣାଗ୍ରସ୍ତ ହୋଇଥିଲା ।ଦୁର୍ଘଟଣାରେ ଆହତ ଖଦାଳକୁ ବୁଗୁଡ଼ା ମେଡିକାଲକୁ ଅଣାଯାଇଥିଲା । ପୁଅର ଦୁର୍ଘଟଣା ଖବର ପାଇ ବାପା ବାଳି ରାଉତ ଓ ମାଉସୀ ପୁଅ ଭାଇ ସିମାଞ୍ଚଳ ନାୟକ ଏକ ବାଇକରେ ବୁଗୁଡ଼ା ମେଡିକାଲକୁ ଆସୁଥିଲେ ।ଦୁର୍ଭାଗ୍ୟବଶତଃ ସେମାନେ ପୁଣି ସେହି ସ୍ଥାନରେ ହିଁ ଦୁର୍ଘଟଣାର ଶିକାର ହେଲେ । ସେ ଦୁହିଁଙ୍କୁ ପୁଣି ଉଦ୍ଧାର କରାଯାଇ ବୁଗୁଡ଼ା ମେଡିକାଲକୁ ଅଣାଯାଇଥିଲା ।ଦୁର୍ଘଟଣାରେ ବାପା ବାଳିଙ୍କ ମୁହଁରେ ଏବଂ ଭାଇ ସିମାଞ୍ଚଳଙ୍କ ବାମ ଗୋଡ଼ ଓ ମୁଣ୍ଡରେ ଆଘାତ ଲାଗିଥିଲା । ଅନ୍ୟପକ୍ଷରେ ଖଦାଳର ମୁଁହ ଓ ମୁଣ୍ଡରେ ପ୍ରବଳ ଆଘାତ ଲାଗି ଥିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ ଗୁରୁତର ଅବସ୍ଥାରେ ବ୍ରହ୍ମପୁର ବଡ ମେଡିକାଲକୁ ୧୦୮ ଆମ୍ବୁଲାନ୍ସ ଯୋଗେ ସ୍ଥାନାନ୍ତର କରାଯାଇଥିଲା । ଖରିଡା ଛକରେ ବିନା ସଂକେତ ଫଳକରେ କଲଭର୍ଟ କାମ ଚାଲିଥିବା ଯୋଗୁଁ ଏଭଳି ଦୁର୍ଘଟଣାମାନ ରାତିରେ ଘଟୁଥିବା ନେଇ ସାଧାରଣରେ ଆଲୋଚନା ହେଉଥିବା ଜଣାଯାଇଛି ।