ଦୁଇ ବାଇକ୍ ମୁହାଁମୁହିଁ ଧକ୍କା, ୨ ଗୁରୁତର
ବୁଗୁଡ଼ା : ତା ୧୭/୦୨/୨୩ : ସ୍ଥାନୀୟ ମାଳିଝୋଳା ମନ୍ଦିର ନିକଟରେ ଦୁଇଟି ବାଇକ୍ ମୁହାଁମୁହିଁ ଧକ୍କା ହେବା ଫଳରେ ଦୁଇ ଜଣ ଗୁରୁତର ଅବସ୍ଥାରେ ବ୍ରହ୍ମପୁରକୁ ସ୍ଥାନାନ୍ତର ହୋଇଥିବା ଜଣାଯାଇଛି । ଗୁରୁତର ଦୁଇ ଜଣ ହେଲେ ବୁଗୁଡ଼ା ବ୍ଲକ ଖୋଳଖାଳି ପଞ୍ଚାୟତ ଅନ୍ତର୍ଗତ ଚକରାପଲ୍ଲୀ ଗ୍ରାମର ଜୟ ଜେନା (୫୦) ଓ ବୁଗୁଡ଼ାର ବିଷ୍ଣୁ ବେହେରା (୨୫) । ଘଟଣାରୁ ପ୍ରକାଶ ଯେ, ଆଜି ଅପରାହ୍ନରେ ଜୟ ଅନ୍ଯ ଜଣଙ୍କ ବାଇକରେ ବସି ବେତାରସିଂ ଗ୍ରାମରୁ ବୁଗୁଡାକୁ ଫେରୁଥିଲେ ଏବଂ ବିଷ୍ଣୁ ଦୁଇ ଜଣଙ୍କ ସହ ଗୋଟିଏ ବାଇକରେ ବସି ବୁଗୁଡ଼ାରୁ ଜଗନ୍ନାଥପ୍ରସାଦ ବ୍ଳକ୍ର କୁମୁଣ୍ଡା ଗାଁକୁ ଯାଉଥିଲେ । ତେବେ ମାଳିଝୋଳା ମନ୍ଦିର ନିକଟରେ ବାଇକ୍ ଦୁଇଟି ମଧ୍ଯରେ ମୁହାଁମୁହିଁ ଧକ୍କା ହେବା ଫଳରେ ଜୟ ଓ ବିଷ୍ଣୁ ଆହତ ହୋଇଥିଲେ । ସେମାନଙ୍କୁ ସେଠାରୁ ଉଦ୍ଧାର କରି ବୁଗୁଡ଼ା ମେଡିକାଲକୁ ଅଣାଯାଇଥିଲା । ଦୁର୍ଘଟଣାରେ ଉଭୟଙ୍କ ଡାହାଣ ଗୋଡ଼ ଭାଙ୍ଗି ଯାଇଥିଲା । ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ଉଭୟଙ୍କୁ ୧୦୮ ଆମ୍ବୁଲାନ୍ସ ଯୋଗେ ବ୍ରହ୍ମପୁରକୁ ସ୍ଥାନାନ୍ତର କରାଯାଇଥିଲା ।
