ବିଦ୍ୟୁତ୍ ଆଘାତରେ ଯୁବକଙ୍କ ମୃତ୍ୟୁ

ବୁଗୁଡା : ତା ୧୦/୦୬/୨୪ : ବୁଗୁଡା ବ୍ଲକ ଖୋଳଖାଳି ପଞ୍ଚାୟତ ଅନ୍ତର୍ଗତ ବେଲପୁର ଗ୍ରାମର ଜନୈକ ଯୁବକ ବିଦ୍ଯୁତ୍ ଆଘାତରେ ମୃତ୍ୟୁ ବରଣ କରିଥିବା ଜଣାଯାଇଛି । ମୃତକ ଜଣକ ହେଲେ ବସନ୍ତ ଜେନାଙ୍କ ପୁଅ ଚନ୍ଦନ ଜେନା (୨୦) । ପ୍ରକାଶ ଯେ , ଚେନ୍ନାଇରେ କାମ କରୁଥିବା ଚନ୍ଦନ ଗତ ମାସରେ ନିଜ ଗାଁ ବେଲପୁରକୁ ଆସିଥିଲେ । ଆଜି ସକାଳେ ସେ ମାଣିବନ୍ଧ ଗାଁରେ ତାଙ୍କର ମାମୁଁ ଘରେ ପାଣି ପମ୍ପ୍ ସଜାଡୁଥିବା ବେଳେ ବିଦ୍ୟୁତ୍ ଆଘାତର ଶିକାର ହୋଇଥିଲେ । ତାଙ୍କୁ ଅଚେତ ଅବସ୍ଥାରେ ଉଦ୍ଧାର କରାଯାଇ ବୁଗୁଡା ମେଡିକାଲକୁ ଅଣାଯାଇଥିଲା । ସେଠାରେ ପରୀକ୍ଷା ନିରୀକ୍ଷା ପରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ । ଚନ୍ଦନଙ୍କ ମୃତ୍ୟୁ ଘଟଣା ବେଲପୁର ଗ୍ରାମରେ ଶୋକର ଛାୟା ଖେଳାଇ ଦେଇଛି ।