ବୋଇତବାଙ୍କରେ ନୂତନ ଉପ ସ୍ୱାସ୍ଥ୍ୟକେନ୍ଦ୍ରର ଶିଳାନ୍ୟାସ
ବାଲେଶ୍ଵର(ଶେଖ୍ ନଜିମ): ରେମୁଣା ବ୍ଲକ ତେନ୍ତୁଳିଦା ପଞ୍ଚାୟତ ଅନ୍ତର୍ଗତ ବୋଇତବାଙ୍କଠାରେ ନୂତନ ଉପ ସ୍ୱାସ୍ଥ୍ୟକେନ୍ଦ୍ରର ଶିଳାନ୍ୟାସ ରେମୁଣା ବିଧାୟକ ତଥା ଶାସକ ଦଳ ଉପମୁଖ୍ୟ ସଚେତକ ଗୋବିନ୍ଦ ଚନ୍ଦ୍ର ଦାସଙ୍କ ଦ୍ୱାରା ଅନୁଷ୍ଠିତ ହୋଇଯାଇଛି। ୩୧ ଲକ୍ଷ ୯୩ ହଜାର ଟଙ୍କା ବ୍ୟୟ ଅଟକଳରେ ଉକ୍ତ ଉପ ସ୍ୱାସ୍ଥ୍ୟକେନ୍ଦ୍ର ନିର୍ମାଣ ହେବ। ଏହି ସ୍ୱାସ୍ଥ୍ୟକେନ୍ଦ୍ର ନିର୍ମାଣ ହେଲେ ବୋଇତବାଙ୍କ ସହିତ ଆଖପାଖ ପାଞ୍ଚୋଟି ଗ୍ରାମର ୨୦୦୦ରୁ ଉର୍ଦ୍ଧ୍ବ ଜନସାଧାରଣ ଉପକୃତ ହେବେ। ଏହା ପୂର୍ବରୁ ଯୁବ ନେତା ଅଭିଜିତ ପଣ୍ଡାଙ୍କ ନେତୃତ୍ୱରେ ବାଲିପାଳ ଛକରୁ ଏକ ଭବ୍ୟ ବାଇକ ରାଲି ଦ୍ୱାରା ଉତ୍ସବ ସ୍ଥଳକୁ ପାଛୋଟି ଅଣାଯାଇଥିଲା। ପରେ ଗ୍ରାମରେ ପହଞ୍ଚିବା ପରେ ମାତୃ ମଣ୍ଡଳିଙ୍କ ଦ୍ୱାରା ସ୍ୱାଗତ କରାଯାଇଥିଲା। ବିଧାୟକ ନଡ଼ିଆ ବାଡେଇ ଫିତା କାଟି ଫଳକ ଉନ୍ମୋଚନ କରିଥିଲେ।ଏହି କାର୍ଯ୍ୟକ୍ରମରେ ଅନ୍ୟାମାନଙ୍କ ମଧ୍ୟରେ ପୂର୍ବତନ ବ୍ଲକ ଅଧକ୍ଷ ତଥା ତେନ୍ତୁଳିଦା ପଞ୍ଚାୟତର ସମିତି ସଭ୍ୟ ସୁଶାନ୍ତ ପଟ୍ଟନାୟକ, ସରପଞ୍ଚ ସଂଜୀବ କର, ୱାର୍ଡ ମେମ୍ବର ହୃଦାନନ୍ଦ ପାଣିଗ୍ରାହୀ ପ୍ରମୁଖ ଉପସ୍ଥିତ ଥିଲେ। ପରେ ଗ୍ରାମର ଅନିମେଷ ସ୍ୱାଇଁଙ୍କ ନେତୃତ୍ୱରେ ଏକ ଯୁବ ପତିନିଧି ଦଳ ବିଧାୟକଙ୍କ ବିଭିନ୍ନ ଉନ୍ନତି ମୂଳକ କାର୍ଯ୍ୟ ଲାଗି ଏକ ଦାବିପତ୍ର ପ୍ରଦାନ କରିଥିଲେ। ବିଧାୟକ ଦାବିପତ୍ର ଗ୍ରହଣ କରିବା ସହ ଖୁବ ଶୀଘ୍ର ବୋଇତବାଙ୍କ ସେତୁର ସଂଯୋଗୀକରଣ ରାସ୍ତା, ଉତ୍କଳମଣି ଯୁବକସଂଘ ଗୃହ ମରାମତି ଲାଗି ପ୍ରତିଶୃତି ପ୍ରଦାନ କରିଥିଲେ। ଏହି ଶିଳାନ୍ୟାସ କାର୍ଯ୍ୟକ୍ରମରେ ସମସ୍ତ ଗ୍ରାମବାସୀ ସହଯୋଗ କରିଥିଲେ।
